ქარელში დაშავებული “მთავარი არხის” ოპერატორი, ლევან აბლოთია “ნიუ ჰოსპიტალიდან” ცოტა ხნის წინ გაწერეს.
“აივანზე ვიყავით, ესენი შიგნით იყვნენ, შუქიც ჩააქრეს და შემდგომ უკვე, როდესაც მე და ბექა სტენდაფს ვწერდით, გამოვარდა 4 თუ 5 ადამიანი. ზოგი უკნიდან კამერის წართმევას ცდილობდა, ზოგი წინიდან და ვარიდებდი თავს. უკან-უკან მივდიოდი, იმიტომ, რომ მინდოდა დისტანცია მქონოდა იმ აგრესორ ადამიანსა და ჩემს შორის, რა დროსაც მოაჯირი ყოფილა უკან და ამ ჭიდაობაში, ხელის კვრაში მე წონასწორობა დავკარგე და გადავვარდი,” – განაცხადა ლევან აბლოთიამ.
შემთხვევის ამსახველი ვიდეომასალა ტექნიკის დაზიანების გამო არ არსებობს. გამოძიება ჯანმრთელობის ნაკლებად მძიმე ან გაუფრთხილებლობით მძიმე დაზიანების მუხლით მიმდინარეობს.
ინციდენტი ქარელში, 15 სექტემბერს, გვაინ საღამოს მოხდა. როგორც „მთავარი არხის“ გენერალურმა დირექტორმა განაცხადა, გადამღებ ჯგუფს „ქართული ოცნების“ შტაბში თავს დაესხნენ და ოპერატორი მეორე სართულიდან გადმოაგდეს.
განსხვავებულ ვერსიას ჰყვებიან თვითმხილველები: ოპერატორს არავინ შეხებია, მან წონასწორობა დაკარგა და კიბის ზედა საფეხურზე დავარდა. ინციდენტის შემდეგ ხმაური იყო ქარელის საავადმყოფოში, სადაც დაშავებული ოპერატორი გადაიყვანეს.