თვითონაც იციან ვინც არის მიხეილ სააკაშვილი, სხვანაირად ვერ გაამართლებენ მას და ამიტომ ეძახიან პოლიტპატიმარს. თვითონაც იციან, რომ ის არის კრიმინალი, – ამის შესახებ ვალერი გელაშვილმა „იმედის“ ეთერში განაცხადა. ყოფილი დეპუტატის თქმით, გუშინდელი დღე მისთვის ერთ-ერთ საუკეთესო იყო.
„16 წელიწადია იმას ველოდი, რაც გუშინ მოხდა. ჩემთვის ეს დადებითი ემოციები იყო, იმიტომ რომ 16 წელი ვიყო მოლოდინის რეჟიმში. ჩემთვის იყო ერთ-ერთი საუკეთესო დღე, გუშინდელი დღე, როცა მიხეილ სააკაშვილი შეიყვანეს ციხეში“, – განაცხადა გელაშვილმა.
2005 წლის ზაფხულში, გაზეთმა „რეზონანსმა“ იმ დროს პარლამენტის წევრ (რესპუბლიკური პარტია) ვალერი გელაშვილთან ინტერვიუ გამოქვეყნა, რომელშიც დეპუტატმა პრეზიდენტ სააკაშვილთან და მის ოჯახთან დაკავშირებით არაკორექტული განცხადებები გააკეთა. საქმე ეხებოდა პრეზიდენტის სასახლის მშენებლობას. 2005 წლის 14 ივლისს გელაშვილს უცნობი პირები თავს დაესხნენ და სასტიკად სცემეს. დეპუტატმა თავდასხმა ინტერვიუს და პრეზიდენტის მხრიდან ანგარიშსწორებას დაუკავშირა.