სამოქალაქო კლინიკაში გადაყვანა არის ერთად-ერთი საშუალება, რომ მიხეილ სააკაშვილმა პენიტენციური სისტემა, ციხე დატოვოს. მას დღეს სხვა მიზანი არ გააჩნია, – ამის შესახებ საპარლამენტო ფრაქცია „ქართული ოცნების“ თავმჯდომარე მამუკა მდინარაძემ პარტიის ოფისში გამართულ ბრიფინგზე განაცხადა.
ამასთან მამუკა მდინარაძის თქმით, სააკაშვილის სამოქალაქო კლინიკაში გადაყვანის შემთხვევაში გარკვეული რისკები არსებობს.
„პირველი ესაა სააკაშვილის უსაფრთხოება. დღეს ნებისმიერ მსჯავრდებულსა თუ ბრალდებულს ღირსეულად ეპყრობა სახელმწიფო და მისი ჯანმრთელობის მდგომარეობაზე ზრუნავს ქმედითად და არა პოპულისტურად.
დღეს პენიტენციური სამსახურის წარმომადგენლებისგან და იუსტიციის მინისტრის ინტერვიუდან ვიგებთ, რომ სააკაშვილის უსაფრთხოება დაცულია. არ არსებობს პასუხისმგებლობის ფორმა, რომელიც რისკებს აზღვევს. სააკაშვილთან მიმართებით რისკებს აზღვევს სახელმწიფოს სწორი დამოკიდებულება და სწორი ქცევა“, – აღნიშნა მდინარაძემ.
მისი თქმით, პატიმრის გადასაწყვეტი არაა რომელ დაწესებულებაში განთავსდება.
„თქვენ წარმოიდგინეთ ეს საკითხი პატიმრების, მსჯავრდებულებისა და ბრალდებულების გადასაწყვეტი რომ იყოს რომელიმე ქვეყანაში რა მოხდება. მისი გადასაწყევტია ის მიიღებს თუ არ მიიღებს სამედიცინო დახმარებას, ესაა ცივილურ, დემოკრატიულ სამყაროში მიღებული სტანდარტი. მაგრამ რომელ დაწესებულებაში განთავსდება პატიმარი, ესაა კონკრეტული უწყების მიერ ლეგტიმურად გადასაწყვეტი. ესაა იუსტიციის სამინისტრო და პენიტენციური სამსახური,“– განაცხადა მდინარაძემ.