პოლონეთი ბელარუსთან საზღვარზე კედლის მშენებლობას დეკემბერში დაიწყებს და 2022 წლის პირველ ნახევარში დაასრულებს. ინფორმაციას ამის შესახებ ფრანგული გამოცემა Le Figaro პოლონეთის შინაგან საქმეთა სამინისტროზე დაყრდნობით ავრცელებს.
„საქმე, რომელიც ჩვენ უნდა განვახორციელოთ, აბსოლუტურად სტრატეგიული და პრიორიტეტული ინვესტიციაა ქვეყნისა და მოქალაქეების უსაფრთხოებისთვის“, – აღნიშნა პოლონეთის შინაგან საქმეთა მინისტრმა, მარიუშ კამინსკიმ.
8 ნოემბერს, ბელარუსის ტერიტორიიდან არალეგალი მიგრანტების ჯგუფმა პოლონეთთან საზღვარზე ფიზიკური ბარიერის გარღვევა სცადა. პოლონელ მესაზღვრეებს სპეციალური საშუალებების გამოყენება მოუწიათ. პოლონეთის მთავრობის ოფიციალურმა წარმომადგენელმა, პიოტრ მიულერმა განაცხადა, რომ პოლონეთის მთავრობა ბელარუსთან საზღვრის სრულად ჩაკეტვის სცენარს განიხილავს. 9 ნოემბერს, პოლონეთის პრეზიდენტმა, ანდჟეი დუდამ განაცხადა, რომ პოლონეთი მტკიცედ დაიცავს თავის საზღვარს ბელარუსის რეჟიმის მხრიდან თავდასხმებისგან. ლიეტუვა და პოლონეთი ბელარუსთან საზღვრის გასწვრივ მავთულხლართებს აგებენ, რათა მიგრანტების ნაკადი შეაჩერონ, რომლის ორგანიზებაშიც ბრალს ლუკაშენკოს რეჟიმს სდებენ.
29 ოქტომბერს, პოლონეთის პარლამენტმა ბელარუსთან საზღვარზე კედლის მშენებლობის გადაწყვეტილება დაამტკიცა. პოლონეთმა ბელარუსთან საზღვარზე სამხედროების რაოდენობა 10 ათასამდე გაზარდა. 7 სექტემბერს, მიგრანტების ნაკადის ზრდის ფონზე, პოლონეთმა ბელარუსთან საზღვარზე საგანგებო მდგომარეობა გამოაცხადა.