არსებობს თუ არა მიზეზი, რის გამოც ადამიანის აცრა „ბუსტერით“ არ შეიძლება

საქართველოში კორონავირუსის საწინააღმდეგო ვაქცინის „ბუსტერ დოზის“ მიღება უკვე შესაძლებელია. როგორც სპეციალისტები განმარტავენ, „ბუსტერის“ გაკეთება იმ შემთხვევაშიც შეგიძლიათ, თუ სრული ვაქცინაციის კურსის ჩატარების პარალელურად, კორონავირუსიც გადაიტანეთ. ასეთ შემთხვევაში მესამე დოზა ჯანმრთელობას საფრთხეს არ უქმნის.
არის თუ არა რაიმე სამედიცინო ჩვენება, რომლის დროსაც „ბუსტერის“ გაკეთების რეკომენდაციას არ იძლევიან – დაავადებათა კონტროლის ეროვნული ცენტრის გადამდებ დაავადებათა დეპარტამენტის ხელმძღვანელი ხათუნა ზახაშვილი განმარტავს :
„კოვიდ-19“-ის ვაქცინაციის აბსოლუტური უკუჩვენება არ არსებობს. შესაძლოა, მოხდეს დროებითი გადავადება, მაგ. მწვავე ან ქრონიკული დაავადების გამწვავების დროს.
თუ რაიმე თანმხლები დაავადების ან მდგომარეობის გამო ადამიანს უჭირს, მიიღოს გადაწყვეტილება ვაქცინაციის სასარგებლოდ, ან ჭოჭმანობს ვაქცინათა სახეობების შერჩევისას – პირველადი ან „ბუსტერდოზით“ ვაქცინაციის დროს, ჯობს, მიმართოს სპეციალისტს, რომელიც დაეხმარება სწორი გადაწყვეტილების მიღებაში“.
რაც შეეხება 60 წელს გადაცილებულთათვის „ბუსტერდოზის“ რეკომენდაციას, ხათუნა ზახაშვილი ამბობს, რომ ამ ასაკობრივი კატეგორიის ადამიანებისთვის პირველადი და „ბუსტერვაქცინაცია“ „კოვიდ-19“-ის წინააღმდეგ – უპირველესი პრიორიტეტია.