ოპერის მომღერალი, პოლიტიკური მოძრაობის, „სახელმწიფო ხალხისთვის“ დამაარსებელი პაატა ბურჭულაძე თბილისში, მიხეილ სააკაშვილის საპრეზიდენტო ბიბლიოთეკაში შიმშილობს. ბურჭულაძე უცხოეთიდან 15 ნოემბერს დაბრუნდა და მეორე დღეს შიმშილობა გამოაცხადა საქართველოს მესამე პრეზიდენტის მულტიფუნქციურ სამოქალაქო კლინიკაში გადაყვანის მოთხოვნით.
მრავალპროფილიან სამოქალაქო კლინიკაში მიხეილ სააკაშვილის გადაყვანის მოთხოვნით, 3 ნოემბრიდან საქართველოს პარლამენტის შენობაში შიმშილობს პარტია “დროას” ლიდერი, დეპუტატი ელენე ხოშტარია. 14 ნოემბრიდან, ამავე მოთხოვნით, პარლამენტში შიმშილობა დაიწყო ფრაქციის, “ნაციონალური მოძრაობა-გაერთიანებული ოპოზიცია ძალა ერთობაშია”-ს 9 დეპუტატმა: დავით კირკიტაძემ, აკაკი მინაშვილმა, თემურ ჯანაშიამ, ბაჩუკი ქარდავამ, ნიკა მაჭუტაძემ, გიორგი გოდაბრელიძემ, სულხან სიბაშვილმა, ლევან ბეჟაშვილმა და აბდულა ისმაილოვმა. თბილისში შიმშილობა აქვთ გამოცხადებული “ნაციონალური მოძრაობის” წევრს, გიორგი ბარამიძესაც და “კლინიკების ასოციაციის” დამფუძნებელს, ვილი პაჭკორიას.
სამოქალაქო კლინიკაში მიხეილ სააკაშვილის გადაყვანის მოთხოვნით, შიმშილობის აქცია მიმდინარეობს რამდენიმე სხვა ქალაქშიც. „ნაციონალური მოძრაობის“ 6 წევრი შიმშილობს რუსთავის საკრებულოში და ამავე პარტიის 5 წევრი და 1 მხარდამჭერი ზუგდიდის საკრებულოში. ბათუმში, „ნაციონალური მოძრაობის“ ოფისში შიმშილობს პარტიის 2 აქტივისტი.