გერმანიაში გამკაცრებული კოვიდრეგულაციები ამოქმედდება

გერმანიის კანცლერმა ანგელა მერკელმა და ქვეყნის 16-მა პრემიერმა, „კოვიდ-19“-ის წინააღმდეგ ახალი შეზღუდვები წარუდგინეს ქვეყნის პარლამენტს, სადაც აღნიშნულ საკითხთან დაკავშირებით ცხარე დებატები გაიმართა.
ანგელა მერკელმა და ქვეყნის 16 რეგიონის პრემიერებმა შეთანხმებას მიაღწიეს გამკაცრებული კოვიდრეგულაციების თაობაზე.
ქვეყნის ლიდერმა კიდევ ერთხელ გაამახვილა ყურადღება ვაქცინაციის მნიშვნელობაზე, ყველა სამკურნალო დაწესებულებისა და მოხუცებულთა სახლების პერსონალისთვის. მხარეები შეთანხმდნენ, რომ ამოქმედდება ე.წ. 2G რეგულაციები, რაც მხოლოდ აცრილთა თავისუფალ გადაადგილებას გულისხმობს „მწვანე საშვების“ მეშვეობით. რეგულაციები ასევე არ შეეხებათ იმ პირებს, რომლებმაც ინფექცია ახლახან გადაიტანეს. მერკელმა აღნიშნა, რომ ქვეყანაში დადგა „გადამწყვეტი ზომების მიღების“ დრო და ხაზი გაუსვა იმას, რომ მდგომარეობა, მართლაც, საგანგაშოა.
ახალი რეგულაციების თანახმად, მათი ამოქმედება კონკრეტულ რეგიონებში დამოკიდებული იქნება ჰოსპიტალიზაციის მაჩვენებლებზე, რაც იმას ნიშნავს, რომ თუ 100 000 მოსახლეზე სამ ადამიანს ჰოსპიტალიზაცია დასჭირდება, რეგიონში ამოქმედდება „2G“ რეგულაციები, რომელიც ყველა საზოგადოებრივი თავშეყრის ადგილებში აქტივობის აკრძალვას გულისხმობს. იმ შემთხვევაში, თუ 100 000 მოსახლეზე ჰოსპიტალიზაციის 9 შემთხვევა დაფიქსირდება, ავტომატურად ამოქმედდება „2G“-თი გათვალისწინებული კიდევ უფრო მკაცრი ზომები, რაც კონტაქტების მაქსიმალურად შეზღუდვას მოიცავს.
აღსანიშნავია, რომ გერმანიის თითქმის ყველა მხარე, გარდა ჰამბურგის, ქვედა საქსონიის, შლესვიგ-ჰოლსტეინის და საარლანდისა, აღნიშნულ კატეგორიაში ხვდება. „2G“ რეგულაციები უკვე მოქმედებს საქსონიასა და ბავარიაში.
ქვეყნის პარლამენტმა უკვე გაახანგრძლივა „ეპიდემიური მდგომარეობის რეჟიმი“, რომლის მოქმედებასაც 25 ნოემბერს გასდიოდა ვადა.

წყარო