საქართველოს პარლამენტის ვიცე-სპიკერი, გია ვოლსკი ექსპრეზიდენტის, მიხეილ სააკაშვილის მიერ ეროვნულ შერიგებასთან დაკავშირებით გაკეთებულ განცხადებას ეხმაურება და აცხადებს, რომ ყოფილი პრეზიდენტის აღნიშნული განცხადება არ შეიძლება, რომ სერიოზულად მივიღოთ.
მისივე შეფასებით, “ნაცმოძრაობის” ლიდერის იდეა შერიგების შესახებ “მოგონილი თემაა,” რომლითაც ახალი დღის წესრიგის შექმნას ცდილობს.
“ვფიქრობ, მოვა დრო, როცა პოლიტიკოსების ახალი თაობა გამონახავს საერთო ენას, თუნდაც, “ნაციონალური მოძრაობის“ სახელით არსებობდეს პოლიტიკური პარტია, თუმცა, ამაშიც ეჭვი მეპარება, რადგან ის ლაქა, რომელიც „ნაციონალურმა მოძრაობამ“ დღემდე მოიტანა, გაუქრობელია და მას შავი ფერი არ აქვს, მას აქვს სისხლისფერი, ეს არის რეალობა და ამ რეალობიდან გამოსვლა არის ერთადერთი – სინანული, მონანიება, სასჯელის მიღება და გარკვეული პერიოდის შემდეგ ახალი იდეით, ახალი თემით დაბრუნება და თუნდაც, შერიგებაზე საუბარი. რევოლუცია ვერ შედგა, სააკაშვილი აღმოჩნდა საკანში. ახლა შერიგების თემა შემოვიდა, თუმცა, ყველამ ვიცით, გეგმა რა იყო, რევოლუციას რა უნდა მოჰყოლოდა და მმართველობის როგორი სისტემა ჰქონდათ ამ ადამიანებს. მისი განცხადება არ შეიძლება მივიღოთ არც სერიოზულად და არც სამოქმედო საკითხად,” – აღნიშნა გიორგი ვოლსკიმ.
ცნობისათვის, მიხეილ სააკაშვილმა გორის სამხედრო ჰოსპიტალიდან გავრცელებულ მორიგ წერილში, ხელისუფლებას ეროვნული შერიგების ინიციატივით მიმართა.
“თუ გონს მოეგებით და წამოხვალთ ეროვნულ შერიგებაზე სანამ გვიან არაა, ეს ყველასთვის საუკეთესო გამოსავალია!” – ნათქვამია სააკაშვილის წერილში.