თავდაცვის სამინისტრომ სრულად დააფინანსა ანანოს ოპერაცია, რეაბილიტაციის ხანგრძლივი კურსი კი გასავლელი გვაქვს, – ამის შესახებ სამხედრო მოსამსახურე რომან სანიკიძე სოციალურ ქსელში წერს და სამინისტროს მხარდაჭერისათვის მადლობას უხდის.
თავდაცვის სამინისტროს ინფორმაციით, სამხედრო მოსამსახურის 11 წლის შვილს, ანანო სანიკიძეს რამდენიმე კვირის წინ მომხდარი ავარიის შედეგად დაუზიანდა თავის ტვინი, დაქვეითებული აქვს მოტორული ფუნქციები და მეტყველება უჭირს.
„22 ოქტომბერი იყო დღე, რომელმაც თითქმის შეაჩერა ჩემი ოჯახის ცხოვრება. ჩემს 11 წლის ქალიშვილს, რომელიც სკოლიდან სახლში ბრუნდებოდა, მანქანამ დაარტყა და ამით თავდაყირა დააყენა მისი ბედნიერი რეალობა, მისი აწმყო და
მომავალი… მაგრამ, ღირსეული და ღვთისნიერი ადამიანების დახმარებით, რომლებმაც თავიანთი შვილების გამოსაკვები ბოლო თეთრები გაიღეს ანანოს გადარჩენისა და მკურნალობისთვის. ჩვენ დღეს თურქეთში, კერძოდ, სტამბოლის
ერთ-ერთი კლინიკაში ვცდილობთ მისი ჯანმრთელობის აღდგენას. მე, როგორც ჯარისკაცმა, რომელიც 26-ე წელია ვემსახურები სამშობლოს, მინდა მადლიერებით აღვნიშნო თავდაცვის სამინისტროს ჩართულობა და მხარდაჭერა განსაცდელის პირველივე დღეებიდან. თავდაცვის მინისტრი, ბატონი ჯუანშერ ბურჭულაძე უშუალოდ ჩაერთო საორგანიზაციო და დაფინანსების საკითხებში, რათა ჩემი შვილი სწრაფად გადაგვეყვანა თურქეთის საუკეთესო კლინიკაში, სადაც მისთვის ყველა საჭირო სამედიცინო პროცედურასა და რეაბილიტაციაზე მაღალკვალიფიციური ექიმები იზრუნებდნენ. თავდაცვის სამინისტრომ სრულად დააფინანსა ანანოს ოპერაცია, რეაბილიტაციის ხანგრძლივი კურსი კი გასავლელი გვაქვს, ამ ყველაფრისთვის მინდა უღრმესი მადლობა გადავუხადო პირადად ბატონ მინისტრს, ასევე თავდაცვის ძალების მეთაურს, გენერალ-მაიორ გიორგი მათიაშვილსა და თავდაცვის ძალების წევრ თითოეულ სამხედრო თუ სამოქალაქო პირს, თბილისის მერიას, ტარიელ ტყემალაძეს, ჯანდაცვის სამინისტროსა და ქართველ ერს, რომელთა წვლილი შეუფასებელია ჩემი შვილის გადარჩენის საქმეში“, – წერს რომან სანიკიძე.