თბილისის საქალაქო სასამართლო ალექსი პეტრიაშვილზე თავდასხმაში ბრალდებულისთვის 12-წლით თავისუფლების აღკვეთასთან დაკავშირებით განცხადებას ავრცელებს.
განცხადების თანახმად, სასამართლომ დადასტურებულად მიიჩნია ლევან მექვაბიშვილის მხრიდან დაზარალებულზე ფიზიკური ძალადობის ფაქტი ჩადენილი ჯგუფურად, განსაკუთრებული სისასტიკით და მას 12 წლით თავისუფლების აღკვეთა მიუსაჯა. სასამართლოს განცხადებას უცვლელად გთავაზობთ:
”თბილისის საქალაქო სასამართლოს სისხლის სამართლის საქმეთა კოლეგიამ ჯანმრთელობის განზრახ მძიმე დაზიანებისათვის ბრალდებულ ლევან მ.-ს მიმართ განაჩენი დაადგინა და მას საბოლოო სასჯელის სახედ და ზომად 12 წლით თავისუფლების აღკვეთა მიუსაჯა.
ლევან მ.-ს ბრალად ედებოდა ცეცხლსასროლი იარაღისა და საბრძოლო მასალის მართლსაწინააღმდეგო შეძენა, შენახვა და ტარება. ასევე, ჯანმრთელობის განზრახ მძიმე დაზიანება ისეთი საშუალებით, რომელიც განზრახ უქმნის საფრთხეს სხვათა სიცოცხლეს ან ჯანმრთელობას, ჩადენილი შეკვეთით, ჯგუფურად, განსაკუთრებული სისასტიკით.
საქმე ეხება, 2016 წლის 26 თებერვალს, ქ.თბილისში უნივერსიტეტის ქუჩაზე მდებარე ძმათა სასაფლაოზე, ალექსი პეტრიაშვილის სიცოცხლისათვის სახიფათო ჯანმრთელობის მძიმე ხარისხის დაზიანებების მიყენების ფაქტს.
სასამართლომ ნაწილობრივ გაიზიარა პროკურატურის მიერ წარმოდგენილი მტკიცებულებები და მოწმეთა ჩვენებების, მხარეთა ახსნა-განმარტებების და სხდომაზე გამოკვლეული მტკიცებულებების შეფასების შემდგომ ლევან მ. წარდგენილ ბრალდებებში ნაწილობრივ გაამართლა. კერძოდ, სასამართლომ მიიჩნია რომ ბრალდების მხარის მიერ ვერ იქნა წარმოდგენილი იმ უტყუარ მტკიცებულებათა ერთობლიობა, რომელიც საკმარისი იქნებოდა ცეცხლსასროლი იარაღისა და საბრძოლო მასალის მართლსაწინააღმდეგო შეძენის, შენახვისა და ტარებისათვის წარდგენილი ბრალდების, ასევე ჯანმრთელობის განზრახ მძიმე დაზიანების მუხლის იმ ნაწილით წარდგენილი ბრალდების დასადასტურებლად, რომელიც გულისხმობს ჯანმრთელობის განზრახ მძიმე დაზიანებას ისეთი საშუალებით, რომელიც განზრახ უქმნის საფრთხეს სხვათა სიცოცხლეს ან ჯანმრთელობას, ჩადენილი შეკვეთით. შესაბამისად, ბრალდების ამ ნაწილში ბრალდებული ლევან მ. გამართლდა.
სასამართლომ დადასტურებულად მიიჩნია ლევან მ.-ს მხრიდან დაზარალებულზე ფიზიკური ძალადობის ფაქტი ჩადენილი ჯგუფურად, განსაკუთრებული სისასტიკით და მას 12 წლით თავისუფლების აღკვეთა მიუსაჯა.
აღნიშნული განაჩენი შეიძლება გასაჩივრდეს სარეზოლუციო ნაწილის გამოცხადებიდან ერთი თვის ვადაში”, – ნათქვამია განცხადებაში.