თბილისის საქალაქო სასამართლოს სისხლის სამართლის საქმეთა კოლეგიამ ძალადობრივი დანაშაულის ჩადენისათვის ბრალდებულ ელენე სიმონიშვილს აღკვეთის ღონისძიების სახედ შეუფარდა გირაო 1000 ლარის ოდენობით, საპატიმრო უზრუნველყოფით. გირაოს თანხის სრული მოცულობით გადახდის შემთხვევაში, ბრალდებული გათავისუფლდება სასჯელაღსრულებითი დაწესებულებიდან.
საქმის მასალების თანახმად, 2016 წლის 10 ნოემბერს, თბილისში, ძიძამ მცირეწლოვანს თავისა და სხეულის სხვადასხვა არეში განზრახ დაზიანებები მიაყენა, რამაც მცირეწლოვანის ფიზიკური ტკივილი გამოიწვია.
პირველ ეტაპზე, ელენე სიმონიშვილი ბავშვის ცემას უარყოფდა, თუმცა ვიდე-ჩანაწერის წარდგენის შემდეგ, მან დანაშაული აღიარა.
ელენე სიმონიშვილის მიერ ერთ-ერთ დასაქმების საიტზე გამოქვეყნებულია განცხადება, სადაც ის საკუთარი გამოცდილებისა და პროფესიონალიზმის შესახებ წერდა.
“პროფესიით ვარ მოცეკვავე, მაგრამ ქმრის დაკარგვის შემდეგ და აგრეთვე, ჩემი ოჯახური პირობების გამო მომიწია ძიძად მუშაობა და ისე მოხდა, რომ ძიძობა ჩემს მეორე პროფესიად იქცა. მეტი რა გითხრათ? დანარჩენს, როცა შევხვდებით, მერე გიამბობთ”, – წერდა ელენე სიმონიშვილი.
