საქართველოს მთავარი პროკურატურა გია და ნოდარ გვიჩიანების, ნიკა ჩემიასა და ნორა კვიციანის მიმართ გამოტანილ განაჩენებს გადახედავს.
საქართველოს მთავარმა პროკურატურამ რამდენიმე გახმაურებული საქმის გადახედვის გადაწყვეტილება მიიღო.
როგორც მთავარ პროკურატურაში დღეს გახდა ცნობილი, ამ საქმეებს შორის არის, გია და ნოდარ გვიჩიანების და ნიკა ჩემიას საქმე, რომლებსაც ნიკა ლომინაძის მკვლელობაში ედებათ ბრალი.
გადასინჯვას დაექვემდებარება აგრეთვე კოდორში განვითარებულ მოვლენებზე ნორა კვიციანის საქმე, ავთანდილ ხერკელაძის საქმე. ასევე გადაისინჯება გიორგი პაპაჩაშვილის მიმართ გამოტანილი განაჩენი; გენერალ ნინუას და მისი მეუღლის მკვლელობაზე მსჯავრდებულის თამაზ გოგიას საქმე.
„საქართველოს პროკურატურამ საზოგადოებისთვის კარგად ცნობილი სამი სისხლის სამართლის საქმეზე, მათ შორის გახმაურებულ საქმეზე უკანონოდ მსჯავრდებულ პირთა განაჩენების გადასინჯვის გადაწყვეტილება მიიღო. პროკურატურის მუშაობის შედეგად პროკურორების დადგენილების საფუძველზე, განაჩენის გადასინჯვის გადაწყვეტილება მიღებული იქნა „თელასის“ ფინანსური დირექტორის ნიკოლოზ ლომინაძის მკვლელობაში მსჯავრდებულების – გიორგი და ნოდარ გვიჩიანების, ნიკა ჩემიას, ავთანდილ ხერკელაძის, გიორგი პაპაჩაშვილის მიმართ. ასევე, გენერალ თამაზ ნინუას და მისი მეუღლის ეთერ ნინუას მკვლელობისთვის მსჯავრდებულების თამაზ გოგიას და კოდორში განვითარებულ მოვლენების დროს დაკავებული მსჯავრდებული ნორა კვიციანის მიმართ“, – აცხადებენ პროკურატურაში.