უკრაინის პრეზიდენტმა, ვლადიმირ ზელენსკიმ უკრაინისა და რუსეთის მოქალაქეებს მიმართა.
უკრაინული მედია ავრცელებს ზელენსკის ვიდეომიმართვას, რომელშიც ის თავდაპირველად უკრაინულად საუბრობს, ხოლო შემდეგ მიმართვას რუსულ ენაზე განაგრძობს.
უკრაინულ ენაზე საუბრისას ზელენსკიმ აღნიშნა, რომ შეხვდა ბიზნესის წარმომადგენლებს და ასევე, ისაუბრა საერთაშორისო საზოგადოების მხრიდან რუსეთის მიმართ დაწესებულ სანქციებზე.
რაც შეეხება რუსულ ენაზე მიმართვას, ზელენსკიმ განაცხადა, რომ ვლადიმერ პუტინთან სატელეფონო საუბრის ინიცირება მოახდინა, თუმცა შედეგად მიიღო სიჩუმე. „თუმცა, სიჩუმე უნდა იყოს დონბასში“, – განაცხადა ზელენსკიმ.
რუსეთის მოქალაქეებისადმი მიმართვისას ზელენსკიმ აღნიშნა, რომ მათ მიმართავს, როგორც უკრაინის მოქალაქე და არა ქვეყნის პრეზიდენტი.
„ჩვენ გვყოფს 2 000 კილომეტრზე მეტი საერთო საზღვარი, რომლის გასწვრივაც დგას თქვენი ჯარი, თითქმის ორასი ათასი ჯარისკაცი, ათასობით სამხედრო მანქანა. თქვენმა ხელმძღვანელობამ მხარი დაუჭირა მათ ნაბიჯს წინ, სხვა ქვეყნის ტერიტორიაზე. ეს ნაბიჯი შეიძლება, იქცეს ახალი ომის საწყისად ევროპის კონტინენტზე“, – აცხადებს ზელენსკი.
უკრაინის პრეზიდენტის თქმით, ომის საბაბად ნებისმიერი პროვოკაცია შეიძლება, იქცეს.
რუსეთის მოქალაქეებისადმი მიმართვისას ზელენსკიმ აღნიშნა, რომ მათ უკრაინის შესახებ ახალ ამბებში არ აწვდიან ნამდვილ ინფორმაციას.
„თქვენ გეუბნებიან, რომ ჩვენ ვერ ვიტანთ რუსულ კულტურას. როგორ შეიძლება, ვერ იტანდე ნებისმიერ კულტურას. მეზობლები ყოველთვის ამდიდრებენ კულტურულად ერთმანეთს, თუმცა ეს მათ არ ხდის ერთიანს, არ გვაზავებს ჩვენ თქვენში. ჩვენ განსხვავებულები ვართ, მაგრამ ეს არ არის საბაბი იმისთვის, რომ ვიყოთ მტრები.
ჩვენ გვინდა, თავად განვსაზღვროთ და ვაშენოთ ჩვენი ისტორია, მშვიდად, წყნარად, პატიოსნად“, – განაცხადა ზელენსკიმ.
ზელენკიმ აღნიშნა, რომ უკრაინელ ხალხსა და ხელისუფლებას უნდათ მშვიდობა და მოუწოდა რუს ხალხს, მოუხმონ საღ აზრს. ზელენსკის თქმით, უკრაინას მხარს უჭერს მრავალი ქვეყანა, რადგანაც მსოფლიოსთვის მნიშვნელოვანია, დაიცვას სამართლიანობა.
„ზუსტად ვიცით, ჩვენ არ გვინდა ომი – არც ცივი, არც ცხელი, არც ჰიბრიდული. თუმცა, თუკი შემოგვიტევენ, ჩვენი ქვეყნის წართმევას დაგვიპირებენ, ჩვენი თავისუფლების, სიცოცხლის, ჩვენი შვილების სიცოცხლის წართმევას, ჩვენ დავიცავთ თავს. თავდასხმისას თქვენ დაინახავთ ჩვენს სახეებს და არა ჩვენს ზურგებს“, – განაცხადა ზელენსკიმ.
უკრაინის პრეზიდენტმა აღნიშნა, რომ უკრაინა საფრთხეს არ წარმოადგენდა და არც მომავალში წარმოადგენს რუსეთისთვის. მისი თქმით, უკრაინა მისი უსაფრთხოების გარანტიებს ითხოვს და მისი მიზანია მშვიდობა.
„უნდათ რუსებს ომი? ძალიან მინდა, ამ შეკითხვას გავცე პასუხი. ეს პასუხი დამოკიდებულია მხოლოდ თქვენზე, რუსეთის ფედერაციის მოქალაქეებო“, – განაცხადა უკრაინის პრეზიდენტმა მიმართვისას.