ადამიანის უფლებათა დაცვისა და გამოძიების ხარისხის მონიტორინგის მიმართულებით არაერთი მნიშვნელოვანი ღონისძიება განხორციელდა – ამის შესახებ შინაგან საქმეთა მინისტრმა, ვახტანგ გომელაურმა პარლამენტში, „მინისტრის საათის“ ფორმატში ანგარიშის წარდგენისას განაცხადა.
„2021 წელს შინაგან საქმეთა სამინისტრომ დაიწყო სქესობრივი თავისუფლებისა და ხელშეუხებლობის წინააღმდეგ მიმართულ დანაშაულებზე მსჯავრდებულ პირთა მონიტორინგი. ამ მიზნით, მიღებულ იქნა შესაბამისი კანონმდებლობა და აქტიურად დაიწყო მისი აღსრულება. ამასთანავე, აღნიშნულ დანაშაულებზე მთელი წლის განმავლობაში მიმდინარეობდა გამომძიებელთა გადამზადება და ამ ეტაპზე 240 სპეციალიზებული გამომძიებელი უზრუნველყოფს მსგავსი ტიპის დანაშაულებების გამოძიებას.
შინაგან საქმეთა სამინისტროს სისტემაში შეზღუდული შესაძლებლობების მქონე პირთა უფლებების დაცვის 2021 წლის სამოქმედო გეგმა დამტკიცდა, ასევე შეიქმნა საკონსულტაციო ჯგუფი, რომლის საქმიანობასთან დაკავშირებული საკითხების კოორდინაცია დაევალა ადამიანის უფლებათა დაცვისა და გამოძიების ხარისხის მონიტორინგის დეპარტამენტს“ ,- განაცხადა შინაგან საქმეთა მინისტრმა.