მოსკოვის „ლუჟნიკის“ სტადიონზე იმართება აქცია-კონცერტი, რომელიც ყირიმისა და სევასტოპოლის ანექსიის მერვე წლისთავს ეძღვნება. წამყვანები ამ მოვლენებს „მშობლიურ ნავსაყუდელში დაბრუნებას“ უწოდებენ.
კონცერტის წამყვანები გამუდმებით ახსენებენ ომს, რომელსაც რუსეთი აწარმოებს უკრაინაში, თუმცა მას ომს არ უწოდებენ. აცხადებენ, რომ რუსი სამხედროები უკრაინაში „ნაციზმს“ ებრძვიან.
კონცერტზე სიტყვით გამოვიდა ე.წ დონეცკის სახალხო რესპუბლიკის საველე მეთაურის, ვოლნოვახასთან დაღუპული ვლადიმირ ჟოგას მამა. ჟოგას სიკვდილის შემდეგ რუსეთის გმირის წოდება მიენიჭა.
მსახიობმა დმიტრი პევცოვმა განაცხადა, რომ სჯერა, რომ უკრაინელები, ბელარუსები და რუსები მალე ერთ მრავალეროვნულ ქვეყანას შექმნიან. მსახიობმა ვლადიმირ მაშკოვმა წაიკითხა ფიოდორ ტიუტჩევის ლექსი, რომელიც აკრიტიკებს დასავლეთს.
ოლეგ გაზმანოვმა იმღერა “ოფიცრები”, რომლის ტექსტიც ასეთია: “უკრაინა და ყირიმი, ბელარუსი და მოლდოვა – ეს ჩემი ქვეყანაა”. ჯგუფმა „ლუბემ“ შეასრულა ასევე მილიტარისტული სიმღერა.