ჩვენ სოლიდარულები ვართ უკრაინის მიმართ, მაგრამ პირველ რიგში უნდა ვიფიქროთ ჩვენს მოსახლეობაზე და მაქსიმალურად ავიცილოთ მათთვის დიდი ზიანის მიყენება, – ამის შესახებ სოფლის მეურნეობის მინისტრმა ოთარ შამუგიამ საქართველოს მთავრობის სხდომის დასრულების შემდეგ გამართულ ბრიფინგზე განაცხადა. მისივე თქმით, საქართველო ამ ეტაპზე აგრძელებს რუსეთთან არსებულ სავაჭრო ურთიერთობას.
“ჩვენ სრულ მხარდაჭერას ვუცხადებთ უკრაინას, სოლიდარულები ვართ, მაგრამ პირველ რიგში უნდა ვიფიქროთ ჩვენს მოსახლეობაზე და მაქსიმალურად ავიცილოთ მათთვის დიდი ზიანის მიყენება. დღევანდელ რეალობაში ჩვენ გვაქვს სავაჭრო ურთიერთობა რუსეთთან, გარკვეული პროდუქცია შემოდის და გადის კიდეც. კვლევებმაც დაადასტურა, რომ ის გადაწყვეტილებები, რაც პრემიერმა ამ ვითარებაში მიიღო, მოსახლეობის უმეტესი ნაწილის მიერ არის მხარდაჭერილი”, – აღნიშნა ოთარ შამუგიამ.