ადიგენის მუნიციპალიტეტის სოფელ ბოლაჯურში ავტოსაგზაო შემთხვევას მცირეწლოვანი ბავშვის სიცოცხლე ემსხვერპლა.
როგორც ბოლაჯურის მცხოვრებლები ჰყვებიან, გოგონა ძმასთან ერთად სკოლიდან ბრუნდებოდა, რა დროსაც, სოფლის გზაზე, გადაჭარბებული სიჩქარით მოძრავი, „ნისანის“ მარკის მსუბუქი ავტომანქანა დაეჯახა.
„ჩვენ რომ მივედით, ბავშვი უკვე მკვდარი იყო. შემთხვევა თითქმის სოფლის ცენტრში, სკოლიდან 300-400 მეტრში მოხდა. ბავშვი შუა გზაზე არ ყოფილა გვერდზე გადასულა, მაგრამ მთვრალი იჯდა საჭესთან და მაინც დაეჯახა. შეჯახება იმდენად ძლიერი იყო, მანქანაც კი დაზიანდა“, – განაცხადა გარდაცვლილის ბიცოლამ.
გოგონასთან ერთად მყოფი ძმა შემთხვევის შედეგად არ დაშავებულა.
ავტომანქანას იმავე სოფლის მცხოვრები 29 წლის ახალგაზრდა მართავდა. იგი სამართალდამცველებმა ადგილზე დააკავეს.
საქმეზე გამოძიება სისხლის სამართლის კოდექსის 276-ე მუხლის მე-5 ნაწილით მიმდინარეობს.