აშშ-ის პრეზიდენტის სპეციალურმა წარმომადგენლებმა, სტივ უიტკოფმა და ჯარედ კუშნერმა მოსკოვში ვიზიტი გადადეს, – წერს Axios-ი. გამოცემის მონაცემებით, ვიზიტი გადადებულია სულ მცირე მანამ, სანამ არ გაირკვევა, არიან თუ არა მზად უკრაინა და მისი ევროპელი მოკავშირეები დათანხმდნენ ახალ სამშვიდობო წინადადებას, რომლის დეტალებიც უცნობია.
Axios-ი 9 ოქტომბერს წერდა, რომ უიტკოფი და კუშნერი რუსეთ-უკრაინის ომის დასასრულებლად „ახალ იდეებსა და წინადადებებს“ ლობირებენ. გამოცემა მაშინ იუწყებოდა, რომ დონალდ ტრამპის სპეციალური წარმომადგენლები რუსეთში ჩასვლას და რუსეთის ხელმძღვანელობასთან „ახალი იდეების“ განხილვას ოქტომბრის ბოლომდე გეგმავდნენ. TASS-ი იმავე დღეს იუწყებოდა, რომ ტრამპის ელჩების ვიზიტი რუსეთში „უახლოესი ორი კვირის განმავლობაში“ იყო მოსალოდნელი.
უიტკოფი და კუშნერი მოსკოვში ბოლოს 5 სექტემბერს იმყოფებოდნენ, შემდეგ კი კიევში გაემგზავრნენ და უკრაინის პრეზიდენტს, ვოლოდიმირ ზელენსკის შეხვდნენ.
The New York Times-ი 10 ოქტომბერს წერდა, რომ ვაშინგტონმა მოსკოვს დასავლეთში დაბლოკილი რუსული აქტივების მილიარდობით დოლარის განბლოკვა შესთავაზა, რათა რუსეთი უკრაინასთან ომში ცეცხლის ნაწილობრივ შეწყვეტაზე დაეყოლიებინა. The Kyiv Independent-ი ერთი დღით ადრე იუწყებოდა, რომ რუსული მხარე სანქციების ნაწილის მოხსნას ითხოვს ენერგეტიკული ზავის ან შავ ზღვაში დარტყმების შეწყვეტის სანაცვლოდ.
დონალდ ტრამპმა 11 ოქტომბერს გამოაცხადა, რომ რუსეთი და უკრაინა ენერგეტიკულ სფეროში ზავზე შეთანხმდნენ. უკრაინის პრეზიდენტმა ვოლოდიმირ ზელენსკიმ Axios-თან კომენტარში განაცხადა, რომ ტრამპის მიერ გამოცხადებული ზავი მისთვის „ახალი ამბავი აღმოჩნდა“. რუსეთის ხელისუფლებას, 12 ოქტომბრის დილის მონაცემებით, ზავზე თანხმობა არ დაუდასტურებია.