კორუფციაში მხილებული ევროპარლამენტის ვიცე-პრეზიდენტის ევა კაილის საკითხი ერთ-ერთი მთავარი თემა იყო პლენარულ სხდომაზე. ევროპარლამენტის თავმჯდომარის, განცხადებით მომხდარზე შიდა გამოძიება ჩატარდება, ასევე გატარდება რეფორმა, რომ მსგავსი შემთხვევები მომავალში გამოირიცხოს. რობერტა მეცოლამ თქვა რომ კატართან სავიზო რეჟიმის გამარტივების შესახებ ანგარიში კომიტეტს უკან გადაეგზავნება.
„დემოკრატიის მტრები თავს დაესხნენ ევროპარლამენტს, ევროპულ დემოკრატიას, ღია, თავისუფალ, დემოკრატიულ საზოგადოებას. ეს მავნე აქტორები დაკავშირებული არიან ავტოკრატიულ ქვეყნებთან და იარაღად იყენებენ არასამთავრობო ორგანიზაციებს, პროფკავშირებს, ინდივიდუალურ პირებს, საპარლამენტო თანაშემწეებს და ევროპარლამენტის წევრებს, რათა დაიქვემდებარონ პროცესები. მათი მავნებლური გეგმები ჩავარდა. ჩვენი სერვისები, რომლებითაც ვამაყობთ, მუშაობენ ეროვნულ სამართალდამცავ და მართლმსაჯულების ორგანოებთან, რათა ეს სავარაუდო კრიმინალური ქსელი გატეხონ. ჩვენ ვმუშაობთ რათა ყველა კანონიერი ნაბიჯი და ინფორმაცია იყოს დაცული“, – განაცხადა მეცოლამ.
10 დეკემბერს ცნობილი გახდა, რომ ბერძენი ევროდეპუტატი და ევროპარლამენტის ვიცე-სპიკერი ევა კაილი ბელგიის პოლიციამ დააკავა. ის ფიგურირებს ანტიკორუფციულ გამოძიებაში, რომელიც კატარის სასარგებლოდ უკანონო ლობისტურ საქმიანობას ეხება.
გამოძიების ფარგლებში სამართალდამცავებმა კიდევ რამდენიმე ადამიანი დააკავეს. ჩხრეკის შედეგად ამოღებულია 600 ათასი ევრო, მობილური ტელეფონები და კომპიუტერული ტექნიკა.
ევროპარლამენტის პრეზიდენტმა რობერტა მეცოლამ კორუფციულ სკანდალში გახვეულ ევროდეპუტატ ევა კაილის მანდატი შეუჩერა.