საქართველოს პარლამენტში გამართული მინისტრის საათის ფარგლებში იუსტიციის მინისტრმა მიწის სისტემური რეგისტრაციის რეფორმასა და სასოფლო-სამეურნეო დანიშნულების მიწის ნაკვეთების მნიშვნელობაზე ისაუბრა.
იუსტიციის მინისტრმა აღნიშნა, რომ კონსტიტუციით გარანტირებული საკუთრების უფლება ეს არის დამოუკიდებელი საქართველოს ერთ -ერთი მთავარი მონაპოვარი, რომლისთვისაც მრავალი თაობა იბრძოდა. დღეს ეს უფლება გარანტირებული არის საქართველოს კონსტიტუციით. ხოლო საკონსტიტუციო ცვლილებების შედეგად, რომელიც 2017 წელს გატარდა, სასოფლო-სამეურნეო დანიშნულების მიწას მიენიჭა განსაკუთრებული კონსტიტუციური სტატუსი.
მიწის სისტემური რეგისტრაციის რეფორმა საჯარო რეესტრის ეროვნულმა სააგენტომ 2022 წლის პირველი იანვრიდან მთელი ქვეყნის მასშტაბით დაიწყო. რეფორმის დასრულების შემდეგ სრულად იქნება რეგისტრირებული კერძო, სახელმწიფო და მუნიციპალიტეტის მფლობელობაში არსებული მიწის ნაკვეთები. საქართველო კი იქნება იმ ქვეყნებს შორის, რომელსაც მიწაზე საკუთრების უფლების საკითხები ექნება ზედმიწევნით მოწესრიგებული.