კორუფციულ სკანდალთან დაკავშირებული საქმის გამოძიების ფარგლებში, ბელგიის სასამართლო ევროპარლამენტის ორი წევრისთვის იმუნიტეტის მოხსნას ითხოვს. ინფორმაციას ამის შესახებ სააგენტო „ფრანს-პრესი“ (AFP) ავრცელებს.
გავრცელებული ინფორმაციით, საუბარია ევროპარლამენტის ორ დეპუტატზე: იტალიელ ანდრეა კოცოლინოსა და ბელგიელ მარკ ტარაბელაზე, რომლებიც ევროპარლამენტის „სოციალ-დემოკრატების“ ჯგუფს მიეკუთვნებიან.
10 დეკემბერს ცნობილი გახდა, რომ ბერძენი ევროდეპუტატი და ევროპარლამენტის ვიცე-სპიკერი, ევა კაილი ბელგიის პოლიციამ დააკავა. ის ფიგურირებს ანტიკორუფციულ გამოძიებაში, რომელიც კატარის სასარგებლოდ უკანონო ლობისტურ საქმიანობას ეხება.
გამოძიების ფარგლებში სამართალდამცავებმა კიდევ რამდენიმე ადამიანი დააკავეს. ჩხრეკის შედეგად ამოღებულია 600 ათასი ევრო, მობილური ტელეფონები და კომპიუტერული ტექნიკა.
11 დეკემბერს, ევროპარლამენტის პრეზიდენტმა, რობერტა მეცოლამ კორუფციულ სკანდალში გახვეულ ევა კაილის მანდატი შეუჩერა.