სამწუხაროდ, ისრაელი ბოლო რამდენიმე დღეა თავდასხმის სამიზნეა. ის რაც ტაძრის მთაზე მოხდა, იყო ტერორისტული ორგანიზაცია ჰამასის მხარდაჭერილი რადიკალების ქმედება, რომელთა ერთადერთი მიზანი ძალადობის ინიცირება და ესკალაცია იყო, – ამის შესახებ საქართველოში ისრაელის ელჩმა, ჰადას მეიცადმა „ქრონიკასთან“ ექსკლუზიურ ინტერვიუში განაცხადა. მისი თქმით, სახელმწიფოს ვალდებულებაა, რომ შეინარჩუნოს მშვიდობა ტაძრის მთაზე.
„მესმის, რომ კადრები, რომლებიც გავრცელდა შემაშფოთებელი იყო, თუმცა უნდა გვესმოდეს კონტექსტი – ისრაელის პოლიცია ცდილობდა იმათ ევაკუაციას, ვინც მეჩეთში ძალადობის და სხვა ვიზიტორებზე თავდასხმის განზრახვით მივიდა. ჩვენი ვალდებულებაა შევინარჩუნოთ მშვიდობა და წესრიგი ტაძრის მთაზე.
ჩვენ მაქსიმუმს ვაკეთებთ, რომ თავიდან ავიცილოთ სრული ესკალაცია, რადგან, საბოლოო ჯამში ისრაელმა იცის როგორ დაიცვას თავი. ზოგიერთ თავდასხმაზე უკვე გვქონდა რეაგირება. ჩვენ შევინარჩუნებთ სტატუს კვოს ტაძრის მთაზე“, – აცხადებს ელჩი.
გასულ კვირას, ალ აქსას მეჩეთში ისრაელის პოლიციის მიერ ჩატარებული რეიდი, ისრაელსა და პალესტინას შორის დაძაბულობის გამწვავების საფუძველი გახდა. რეიდებს მუსლიმ მორწმუნეებზე თავდასხმა უწოდა პალესტინის პრეზიდენტის ოფისმა. მომხდარს სარაკეტო იერიშები მოჰყვა ღაზის სექტორიდან, ლიბანიდან და სირიიდან. პარალელურად, თავდასხმები განხორციელდა დასავლეთ სანაპიროზე და თელ–ავიში 4 ადამიანი დაიღუპა.