„ბიბისის“ მიერ გავრცელებული ინფორმაციის მიმართ სანდოობა უაღრესად მაღალია. სავარაუდოა, რომ ამას, სამართლებრივი პროცედურების თვალსაზრისით, გაგრძელება მოჰყვება, – ამის შესახებ პარლამენტის ადამიანის უფლებათა დაცვის კომიტეტის თავმჯდომარემ, მიხეილ სარჯველაძემ განაცხადა.
მისივე თქმით, ე.წ. ქოლცენტრების საქმესთან დაკავშირებით ქართველ სამართალდამცავებს ოპოზიციის მხრიდან სასაყვედურო არაფერი აქვთ.
„დავით კეზერაშვილის პოლიტიკაში მონაწილეობა დამოკლეს მახვილივით ყველა იმ პირს დაადგა თავს, ვინც სხვადასხვა ფორმით პოლიტიკაში ჩართულია და აფილირებულია დავით კეზერაშვილთან. ოპოზიციის საუბარი იმის თაობაზე, სად იყვნენ ქართველი სამართალდამცავები, ქართველი სამართალდამცავები იყვნენ იქ, სადაც უნდა ყოფილიყვნენ და გააკეთეს ზუსტად ის, რაც მათ ევალებოდათ. მათ ამ კუთხით სასაყვედურო არაფერი აქვთ. ადგილი აქვს ყურადღების გადატანის მცდელობას კრიტიკის მიზეზის მოსაძებნად, რათა თავიდან აიცილონ მთავარ კითხვაზე პასუხის გაცემის მოვალეობა, რაც კეზერაშვილთან დაკავშირებით მათ პოზიციას უკავშირდება. ცდილობენ, ამაზე პირდაპირ პასუხებს თავი აარიდონ და ამისთვის ტაქტიკური ხერხი გამოიყენონ და ხელისუფლების მიმართ კრიტიკული პოზიციები გააჟღერონ. „ბიბისის“ მიერ გავრცელებული ინფორმაციის მიმართ სანდოობა უაღრესად მაღალია. სავარაუდოა, რომ ამას, სამართლებრივი პროცედურების თვალსაზრისით, გაგრძელება მოჰყვება. მორალური დილემის წინაშე არიან დარჩენილი პოლიტიკოსები, მედიასაშუალებები და ექსპერტები, რომლებიც კეზერაშვილთან არიან აფილირებული. მათ პოლიტიკაში მოღვაწეობისა და პროდასავლურობაზე საუბრის მორალური უფლება რომ ჰქონდეთ, კეზერაშვილთან დაკავშირებულ თემაზე კითხვებს პასუხი უნდა გასცენ“, – განაცხადა მიხეილ სარჯველაძემ