27 ივნისს, სოციალურ ქსელში მომხმარებელმა ნინი გაჩეჩილაძემ კონტროლიორისთვის გადაღებული ფოტო გაავრცელა. ქალი წერდა, რომ ამ კონტროლიორმა 80 წლის მოხუცი დააჯარიმა, რომელიც ამბობდა, რომ “კათარზისში” აგვიანდებოდა, ბილეთის ფული არ ჰქონდა და მშიერი დარჩებოდა, სამ საათამდე თუ ვერ მივიდოდა. ამ ამბავს ძალიან დიდი გამოხმაურება მოჰყვა და კონტროლიორი ქალის მიმართ დიდი აგრესია წამოვიდა. მოგვიანებით, ინცინდენტში დადანაშაულებულმა ქალმა დიანა კვიციანმა პოსტი გამოაქვეყნა, რომელშიც წერდა, რომ აღნიშნული ტყუილი იყო. ქალი, რომელიც თითქოს 80 წლის სოციალურად დაუცველი მოხუცი იყო, რეალურად 72 წლის ქალი აღმოჩნდა, რომელსაც არ ჰქონია სოციალური შემწეობა და არც “კათარზისში” ეჩქარებოდა. მისივე თქმით, დაჯარიმებამდე ის ერთ-ერთ კონტროლიორს ფიზიკურად შეეხო.
დიანა კვიციანმა ასევე დაწერა, რომ გადაწყვიტა, პოსტის ავტორს, ნინი გაჩეჩილაძეს უჩივლოს, რადგან არავის აქვს ბულინგისა და ცილისწამების უფლება, თან ქალმა მისი ნებართვის გარეშე ფოტო გადაუღო და სოციალურ ქსელში დაუსაბუთებელ ბრალდებასთან ერთად გამოაქვეყნა. დიანას გამოქვეყნებული განცხადების დროს, ნინი გაჩეჩილაძეს პოსტი უკვე წაშლილი ჰქონდა. დღეს გაჩეჩილაძემ კიდევ ერთი პოსტი გამოაქვეყნა, რომელშიც წერს, რომ ემოციებს აჰყვა და ძალიან განიცდის, რომ ისიც მოატყუეს. გაჩეჩილაძე ასევე ნერვიულობს იმ ფაქტზე, რომ დიანა მის წინააღმდეგ ჩივილს აპირებს.
ნინი გაჩეჩილაძე:
“მეგობრებისთვის, ასევე იმ ადამიანებისთვის, ვინც ჩემი სტატუსის გამო ინერვიულა, განიცადა ისე, როგორც მე განვიცადე ფაქტი – ასაკოვანი ქალი, რომელიც ამბობდა, რომ მგზავრობის ფული არ ჰქონდა და მიდიოდა “კათარზისში”, რადგან სოცდაუცველი იყო, კონტროლიორმა დააჯარიმა. დიახ, კანონი კანონია და ის, ნებისმიერმა, ასაკის მიუხედავად, უნდა დავიცვათ. დიახ, მე კანონმორჩილი ადამიანი ვარ, თუმცა…
იმ დღეს, გაჩერებაზე, ჩემს ადგილზე ვინც არ უნდა ყოფილიყავით, გააკეთებდით იმას, რაც მე გავაკეთე – მივედი კონტროლიორთან და ვთხოვე არ დაეჯარიმებინა მოხუცი, რომელსაც საჭმლის ფული არ ჰქონდა და რომ ჯარიმის გადახდა გაუჭირდებოდა. სამწუხაროდ, მე არ დამინახავს როგორ ჰკრა ხელი მგზავრმა კონტროლიორს და არც ის ვიცოდი, რომ მგზავრს საერთოდ არ გაუტარებია ბარათი და რომ ზეპირად (ასე ვთქვათ) ამბობდა, ფული არ მაქვსო.
სამწუხაროდ, მე არ ვიცოდი, რომ ეს ქალბატონი ბენეფიციარი არ იყო. ვერც კი წარმოვიდგენდი, რომ მას შეეძლო სიმართლე არ ეთქვა. ახლა გავიგე, რომ მან, ნებსით თუ უნებლიეთ ითამაშა ჩემს (და იქ გარშემო მყოფ სხვა ადამიანების) ემოციებზე. გამოხატვით კი ყველამ სხვადასხვაგვარად გამოვხატეთ ჩვენი პოზიცია.
მე მივედი კონტროლიორთან და ვუთხარი, რომ ამის შესახებ დავწერდი. მან მითხრა – სადაც გინდა დაწერეო. ნებისმიერი პროფესიის წარმომადგენელს აქვს თავისი ემოცია, ჩვენ ადამიანები ვართ და ეს ბუნებრივია. მაგრამ ვერანაირად ვერ წარმოვიდგენდი, რომ მოხუცმა კონტროლიორს ხელი ჰკრა. როგორც ჩანს, სწორედ ამ ქმედებამ გამოიწვია კონტროლიორის გაღიზიანება და სწორიცაა. მეც გავბრაზდები, ვინმემ ხელი რომ მკრას, რომლის შემდეგაც ძნელია მართო ემოცია. კიდევ ვიმეორებ, მე არ ვიცოდი ხელი რომ ჰკრა მგზავრმა კონტროლიორს და ასევე, არ ვიცოდი, რომ ქალბატონი სინამდვილეში ბენეფიციარი არ იყო. ახლა, როცა ყველაფერი გაირკვა, ის კი არ მადარდებს ხვალ-ზეგ კონტროლიორი ჩემს წინააღმდეგ სასამართლოში სარჩელის შეტანას რომ აპირებს, ძალუმად მადარდებს ერთი რამ – ვის შეიძლება ვენდოთ? ვის შეიძლება გამოვესარჩლოთ? ვინ უნდა დავიცვათ? აი, ეს არის ჩემი წუხილი და ის, რომ ერთმა მოხუცმა მგზავრობაში 20 თეთრის გადაუხდელობის გამო, ეჭვის ქვეშ დააყენა ჩემი გულწრფელი ემოცია.
მეტიც, დამაფიქრა სხვა დროს რა გავაკეთო, გამოვესარჩლო ადამიანს, თუ გულგრილად გავიარო? გულგრილობა კი ჩემთვის მიუღებელი და აუტანელია, თუმცა, აი, ცხოვრებამ რა მძიმე მაგალითის მომსწრე გამხადა – ვიღაცის ტყუილის გამო ვიტირე, ვინერვიულე, განერვიულეთ და რაც მთავარია, რბილად რომ ვთქვა, უხერხულ მდგომარეობაში ჩავაყენე ქალი, რომელიც სინამდვილეში თავის მოვალეობას ასრულებდა და მგზავრმა, თავისი ტყუილით წარმოაჩინა ცუდად. რატომ და როდემდე? ნუთუ არ შეიძლება ადამიანებმა ადამიანობა შევინარჩუნოთ? ნუთუ არ შეიძლება მგზავრობის თანხა გადავიხადოთ, რომელიც პენსიონერებისთვის ხუთჯერ მცირეა, ვიდრე არაპენსიონერებისთვის!?
დღეს, 21-ე საუკუნეში, როცა ტექნოლოგიები სინათლის სიჩქარით ვითარდება და არის ვირტუალური სამყარო – “ფეისბუქი”, სადაც ნებისმიერ გამოქვეყნებულ სამართალდარღვევაზე რეაგირება ხდება (ოფიციალურ განცხადებაში გადის), რატომ გახდა ტყუილი ნორმა?დიახ, მოხუცმა ქალმა ითამაშა ჩემს ემოციებზე, ტყუილი იკადრა 20 თეთრისთვის და მე ნებსით თუ უნებლიედ, მაქცია იარაღად! რატომ? რატომ? 20 თეთრი კი არა, ბევრი მილიონიც კი ღირს ამად?ჰოდა, ახლა, რა გავაკეთო მე, ჩემნაირმა ადამიანებმა, ვისაც სისხლში გვაქვს სხვების დახმარება? ძალიან მაწუხებს მომხდარი, ძალიან. მადლობა ყველას, ვინც ჩემი გულწრფელი ემოცია დაინახეთ ამ და იმ სტატუსში, რომელიც სიმართლის გარკვევისთანავე წავშალე!”
