სამხედრო კომპანია „ვაგნერის“ ხელმძღვანელი ევგენი პრიგოჟინი ამბოხების დროს გეგმავდა თავდაცვის მინისტრ სერგეი შოიგუსა და გენერალური შტაბის უფროსის, ვალერი გერასიმოვის დაკავებას დონის როსტოვში მათი ჩასვლისას. ამის შესახებ ოთხშაბათს იტყობინება The Wall Street Journal-ი (WSJ) დასავლეთის ქვეყნების ანონიმ წარმომადგენლებზე დაყრდნობით.
გამოცემის თანახმად, პრიგოჟინს მოუწია გეგმების შეცვლა და იმპროვიზაცია, რადგან ფსბ-მ შეიტყო მისი გეგმის შესახებ. შედეგად მან დაგეგმილზე ადრე დაიწყო ამბოხება, რაც შესაძლოა შეიარაღებული ოპერაციის ჩავარდნის ერთ-ერთი მიზეზი იყო.
როგორც გამოცემის წყაროები ამტკიცებენ, ფსბ-მ შოიგუსა და გერასიმოვის ხელში ჩაგდების გეგმის შესახებ მის სავარაუდო განხორციელებამდე ორი დღით ადრე შეიტყო. ზუსტ თარიღებს არ ასახელებენ. პრიგოჟინმა თავისი გამოსვლა, რომელსაც „სამართლიანობის მარში“ უწოდა, 23 ივნისის საღამოს დაიწყო და იმავე დღეს გამოაცხადა, რომ შოიგუ და გერასიმოვი როსტოვიდან „გაიქცნენ“. ნამდვილად იყვნენ თუ არა ისინი იმ დღეს დონის როსტოვში და ზუსტად როდის აპირებდა პრიგოჟინი მათ დაკავებას, ზუსტად არ არის ცნობილი.
მეორე დღეს, დილით, „ვაგნერის“ რაზმებმა კონტროლი დააწესეს სამხრეთის სამხედრო ოლქის შტაბის შენობაზე. პარალელურად იქ იმყოფებოდა თავდაცვის მინისტრის მოადგილე იუნუს-ბეკ ევკუროვი, რომელმაც, ალიაქსანდრ ლუკაშენკას თქმით, ხელი შეუწყო მასა და პრიგოჟინს შორის მოლაპარაკებებს.