10-12 ივლისს საქართველოს ვიზიტით გერმანიის პარლამენტის პრეზიდენტი ბერბელ ბასი ეწვევა, – ამის შესახებ ინფორმაციას გერმანიის საელჩო ავრცელებს.
საელჩოს განცხაებით, გერმანიის პარლამენტის პრეზიდენტი ბერბელ ბასი თბილისს კოლეგის, შალვა პაპუაშვილის მოწვევით ესტუმრება.
„ქალბატონი ბასი საქართველოში მნიშვნელოვან მომენტში ჩამოდის. საქართველომ განაცხადი გააკეთა ევროკავშირში გაწევრიანებაზე და ამიტომ საუბარი იქნება შემდგომ ნაბიჯებზე ამ მიზნის მისაღწევად. გარდა ამისა ქალბატონი ბასი განიხილავს ასევე უკრაინაში რუსეთის სამხედრო აგრესიის ფონზე საქართველოსა და სამხრეთ კავკასიაში არსებულ მდგომარეობას. პარლამენტის პრეზიდენტი შეხვდება საქართველოს პარლამენტის თავმჯდომარეს, ბატონ შალვა პაპუაშვილს, ასევე საქართველოს პრეზიდენტს, ქალბატონ სალომე ზურაბიშვილსა და საქართველოს პრემიერ-მინისტრს, ბატონ ირაკლი ღარიბაშვილს.
ვიზიტის პროგრამაში არის ასევე სამხრეთ ოსეთთან არსებული ადმინისტრაციული ხაზის მონახულება და ევროკავშირის სადამკვირვებლო მისიის ბრიფინგი.
გერმანიის რანგით მეორე სახელმწიფო წარმომადგენლის ვიზიტი საქართველოში ემსახურება მომავალში ჩვენი მჭიდრო თანამშრომლობის კიდევ უფრო გაღრმავებას“, – აცხადებენ საელჩოში.