ევროკავშირსა და აშშ-ს შორის უკრაინის საკითხზე თანამშრომლობა ამჟამად „ძალიან რთულია“, – ამის შესახებ ევროკავშირის უმაღლესმა წარმომადგენელმა, კაია კალასმა განაცხადა.
კალასის თქმით, ევროკავშირი სანქციების ახალ პაკეტზე მუშაობს, რათა რუსეთზე ზეწოლა განხორციელდეს.
კაია კალასმა განაცხადა, რომ უკრაინაში მომავალი ზამთარი მძიმე და სასტიკი იქნება, რადგან რუსეთი თავდასხმებს აძლიერებს.
„ჩვენ ვცდილობთ, ამერიკელი პარტნიორებიც დავარწმუნოთ, რომ, ამ ომის დასრულება თუ გვსურს, აგრესორზე ზეწოლა უნდა გავაძლიეროთ. საქმე მხოლოდ ომის დასრულებას არ ეხება, უნდა უზრუნველვყოთ, რომ რუსეთმა მომავალში სხვა ომები აღარ წამოიწყოს. „სტარლინკი“ უკრაინისთვის მართლაც აუცილებელია. სამწუხაროდ, მოკლევადიან პერსპექტივაში ევროპას ამ შესაძლებლობის ჩანაცვლება არ შეუძლია. სწორედ ამიტომ ვსაუბრობთ დღეს თავდაცვით მზადყოფნაზე. რუსეთის მხრიდან ვერ ვხედავთ ვერანაირ ნიშანს, რომ ამ ომის შეწყვეტა სურთ ან რაიმე სახის ზავისთვის არიან მზად. სწორედ ამიტომ ჩვენ ნამდვილად უნდა დავეხმაროთ უკრაინელებს გადარჩენასა და საკუთარი ქვეყნის დაცვაში“, – აღნიშნა კაია კალასმა.