საპარლამენტო უმრავლესობის წევრის ბექა ოდიშარიას განცხადებით, პრეზიდენტის მიმართ იმპიჩმენტის პროცედურის დაწყება კარგი არ არის, თუმცა ესაა „ქართული ოცნების“ სამართლებრივი გადაწყვეტილება.
ოდიშარიას თქმით, კონსტიტუციაში მკაფიოდაა გაწერილი უფლებამოსილებები და „ქართული ოცნება“ ამის მიხედვით მოქმედებს.
„ადამიანის მიმართ, რომელიც ჩვენ მიერ ძალიან აქტიურად იყო მხარდაჭერილი, წამოწყებული იქნას ასეთი პროცედურები, ეს არის არა „ქართული ოცნების“ პოლიტიკური, არამედ სამართლებრივი გადაწყვეტილება, რადგან სხვაგვარად არ შეიძლება. კონსტიტუციაში მკაფიოდ გაიწერა უფლებამოსილებები, რადგან გახსოვთ მაგალითად, გარკვეული უთანხმოებები პრემიერ კვირიკაშვილს და პრეზიდენტ მარგველაშვილს შორის, სხვა პრეზიდენტებსა და პრემიერებს შორის, ვინ უნდა წასულიყო, რა მოლაპარაკებები ეწარმოებინა, ან რა ფორუმებში უნდა მიეღო მონაწილეობა.
ვფიქრობ, როდესაც „ქართული ოცნების“ ხელისუფლებას აღებული აქვს პასუხისმგებლობა, როცა ის მუშაობს „ქართული ოცნების“ უმრავლესობით პარლამენტში, და ძალიან აქტიურად მუშაობს, შექმნილი იყო უამრავი სამუშაო ჯგუფი მიმართულებების მიხედვით, მუშაობენ მინისტრები, სამინისტროები აქტიურად და როდესაც შენ მთავრობა, ამ შემთხვევაში გეუბნება, რომ მე მადროვე, ჩემი ხელწერა მივიყვანო ბოლომდე, ვფიქრობ, ეს არ იყო კარგი. რა თქმა უნდა, ზოგადად კარგი არ არის, მაგრამ ამაში „ქართული ოცნების“ დანაშაული აბსოლუტურად ნოლია“, – განაცხადა ბექა ოდიშარიამ.
რაც შეეხება საგარეო ვიზიტებთან დაკავშირებით პრეზიდენტ ზურაბიშვილის განცხადებას, ბექა ოდიშარიას განმარტებით, სალომე ზურაბიშვილის მიმართვა იგივე პათოსით იყო განმსჭვალული, რაც არ გაკვირვებია.
„გუშინ მისმა ძმამ ბრძანა, რომ ის საკმაოდ ჯიუტი პოლიტიკოსია, ეს ვიცოდით კიდეც მის არჩევამდე და მხარდაჭერამდე. ჩვენ ვართ სამართლებრივი ქვეყანა, გვაქვს კონსტიტუცია, ევროპაში ერთ-ერთი საუკეთესო კონსტიტუცია და უმაღლესი თანამდებობის პირების, პრეზიდენტის, პრემიერის, პარლამენტის წევრების, მინისტრების და სხვა პასუხისმგებლობის მქონე პირების განსაკუთრებული მოვალეობაა, რომ დაიცვან კონსტიტუცია“, – აღნიშნა ბექა ოდიშარიამ.