საფრანგეთის პრეზიდენტის, ემანუელ მაკრონის განცხადებით, ნიგერში ქვეყნის ელჩსა და საელჩოს პერსონალს ექცევიან ისე, როგორც მძევლებს. ამის შესახებ ფრანგული მედია იტყობინება.
მაკრონის განცხადებით, ელჩი სილვენ იტე და საელჩოს მთელი პერსონალი სამხედრო ულუფებით იკვებება.
„ახლა, როდესაც ჩვენ აქ ვსაუბრობთ, ჩვენი ელჩი და დიპლომატიური პერსონალი ცხოვრობენ ისე, როგორც მძევლები საფრანგეთის საელჩოში. მათ არ აძლევენ საკვების შეძენის საშუალებას. პერსონალი სამხედრო უფულებით იკვებება“, – აცხადებს მაკრონი.
კითხვაზე, ხომ არ განიხილავს სილვენ იტეს სამშობლოში დაბრუნებას, მაკრონმა განაცხადა, რომ ყოველდღიურად აქვს კავშირი ნიგერის არჩეულ პრეზიდენტ მოჰამედ ბაზუმთან და მხოლოდ მასთან აპირებს ამ საკითხის განხილვას.
ივლისში ნიგერში სამხედრო გადატრიალება მოხდა, რომლის ფარგლებშიც სამხედროების ჯგუფმა ქვეყნის პრეზიდენტი, მოჰამედ ბაზუმი ხელისუფლებას ჩამოაშორეს და კონსტიტუციის მოქმედება შეაჩერეს. ძალაუფლება ხელში ე.წ. ეროვნულმა საბჭომ აიღო, რომელმაც ნიგერის საზღვრები დაკეტა და კომენდანტის საათი გამოაცხადა.
მას შემდეგ რაც 26 აგვისტოს საფრანგეთის ელჩმა, სილვენ იტემ ნიგერის ე.წ. საგარეო საქმეთა მინისტრთან შეხვედრაზე მიწვევას არ უპასუხა, ნიგერის სამხედრო ხუნტამ მას ქვეყნის დასატოვებლად 48 საათი მისცა.