პარლამენტის იურიდიულ საკითხთა კომიტეტის თავმჯდომარის პირველმა მოადგილემ, დავით მათიკაშვილმა კიდევ ერთხელ განმარტა, თუ რას გულისხმობს საარჩევნო კოდექსში შესატანი ცვლილებები. მისი თქმით, დიდწილად გაზიარებულ იქნა ევროკომისარ ოლივერ ვარჰეის შემოთავაზება.
“12-პუნქტიანი გეგმის შესრულების სივრცეში ჩვენთვის ძალიან მნიშვნელოვანია საარჩევნო კანონმდებლობის რეფორმა. საზოგადოებისთვის ცნობილია ევროკომისარ ვარჰეის შემოთავაზება კუთხით, რომელიც დიდ წილად იქნა გაზიარებული ქართული მხარის მიერ. საარჩევნო კანონმდებლობის წინამდებარე რეფორმა გულისხმობს ცესკოს თავმჯდომარის და წევრების არჩევის განახლებულ წესს. გათვალისწინებულია, როგორც საპარლამენტო სივრცეში გადაწყვეტილების მიღება, ასევე, კრიზისული სიტუაციიდან გამოსავალი, რაც პრეზიდენტის კონკრეტულ ჩართულობას გულისხმობს.
რადიკალური ოპოზიციის დღის წესრიგი არის საქართველოსთვის ყველა წინაღობის შექმნა, იმ გზაზე, რომელსაც ევროკავშირის კანდიდატი სტატუსი ჰქვია. ისინი არ მონაწილეობენ შესაბამის პროცესებში, ბოიკოტს უცხადებენ ამ ძალიან მნიშვნელოვან გზას,” – აღნიშნა დავით მათიკაშვილმა.
ცნობისთვის, პარლამენტი საარჩევნო კოდექსში შესატანი ცვლილებების საკომიტეტო განხილვებს იწყებს. “ქართული ოცნების” მიერ დარეგისტრირებულ საკანონმდებლო პაკეტზე, ხვალ საპროცედურო და იურიდიულ კომიტეტებზე იმსჯელებენ. საუბარია, ცესკოს დაკომპლექტების წესზე. ცვლილებების მიხედვით, ცესკოს თავმჯდომარის და ორი წევრის შესარჩევად საჭიროა 90 ხმა. იმ შემთხვევაში თუ კვორუმი ვერ შედგება, შესარჩევად საჭირო ხმათა რაოდენობა 76 გახდება. თუ ვერც 76 ხმა მოგროვდება, ამ შემთხვევაში საკითხი პრეზიდენტს გადაეცემა.