რისთვისაც შემოიპარა სააკაშვილი არაჟნების კონტეინერით, რისთვისაც იყო ჩამოსული მისი დაცვის წევრი, ბატურინი, რისთვისაც 6 შეიარაღებული უკრაინელი ადამიანი დააკავეს – ეს ყველაფერი არის მტკიცებულებები წარსულიდან, იმის რასაც სუსი ლაპარაკობდა და თავად სააკაშვილმა არ დააყოვნა და მყარი დასტური მისცა სუსის იმ განცხადებას, – ამის შესახებ „ქართული ოცნების“ აღმასრულებელმა მდივანმა და ფრაქცია „ქართული ოცნების“ თავმჯდომარემ მამუკა მდინარაძემ ჟურნალისტებს განუცხადა.
„რაზეც ილაპარაკა სამი დღის წინ სუსმა, ის უმალვე დაადასტურა რამდენიმე ადამიანმა ოპოზიციიდან. მანამდე, ისიც უნდა აღინიშნოს რომ კუბილიუსმა წინასწარ დაადასტურა თავისი განცხადებით და შემდეგ სააკაშვილმა განაგრძო. სააკაშვილი, რომელიც დღეს საქართველოს მოქალაქე არ არის, არის მსჯავრდადებული უმძიმეს დანაშაულებში, აანონსებს რაღაც საკითხების თავისებურად დალაგებას და მისი განცხადება, იმ გეგმის აბსოლუტური დასტურია, რაზეც სუსი ლაპარაკობდა. ჩვენ უამრავი ჩანაწერი ვნახეთ, საკუთარ ყურს და თვალს ენდობა ადამიანი და არა ვიღაც ოდიოზური პოლიტიკოსების განცხადებებს. რისთვისაც შემოიპარა სააკაშვილი არაჟნების კონტეინერით, რისთვისაც იყო ჩამოსული მისი დაცვის წევრი, ბატურინი, რისთვისაც 6 შეიარაღებული უკრაინელი ადამიანი დააკავეს – ეს ყველაფერი არის მტკიცებულებები წარსულიდან, იმის, რასაც სუსი ლაპარაკობდა და თავად სააკაშვილმა არ დააყოვნა და მყარი დასტური მისცა სუსის იმ განცხადებას, რაშიც დეტალურად იყო აღწერილი სისხლიანი, რევოლუციური გეგმა. ერთ რამეში არიან დარწმუნებულები: ვერანაირი მშვიდობიანი გზა ვერ უზრუნველყოფს ხელისუფლების შეცვლას დღეს, იმიტომ, რომ კონკურენტი არ არის. შეიძლება მე ამას არ უნდა ვამბობდე, მაგრამ, სამწუხაროა, რომ არ არსებობს დღეს საქართველოში ოპოზიციური ძალა, რომელსაც შეუძლია, მშვიდობიანი, დემოკრატიული, თავისუფალი არჩევნების პირობებში, კონკურენცია გაუწიოს, მიუახლოვდეს მმართველ პარტიას. ეს არის ძალიან ცუდი. წარსულის ბნელი ცოდვებით დამძიმებული პარტია ხელისუფლებას ვერასდროს გადაიბარებს, მომავლის გეგმებიც რომ სისხლიანი აქვს. ამიტომ ნაცმოძრაობის პერსპექტივა მოშლილია და მათი დაბრუნება შეუძლებელია. ოპოზიცია თუ მათგან დამოუკიდებელი იქნება, მას გაუჩნდება შანსი, რომ მომავალში ხელისუფლება გადაიბაროს, მაგრამ ნაცმოძრობას და მის კლასტერს, გარედან დავალებების მიმღებლებს ამის შანსი არ ექნებათ“, – აღნიშნა მდინარაძემ.