პრეზიდენტიც, რადიკალური ოპოზიციაც, ერთი მიმართულებით მიცურავენ და ამ მიმართულებას ჰქვია დესტაბილიზაცია და რადიკალიზაცია, – ამის შესახებ პარლამენტის იურიდიულ საკითხთა კომიტეტის თავმჯდომარის მოადგილემ, საპარლამენტო უმრავლესობის წევრმა, დავით მათიკაშვილმა განაცხადა.
„სავარაუდოდ, პრეზიდენტს კონსტიტუციიდან დაწყებული, ყველა კანონისა და ნორმატიული აქტის დარღვევა აქვს გადაწყვეტილი, რადგან კონსტიტუციით დაიწყო, ეს საზოგადოებამ დაინახა და დღეს უკვე კანონებს არღვევს. ეს ერთმნიშვნელოვნად ადასტურებს იმას, რომ პრეზიდენტიც, რადიკალური ოპოზიციაც, ერთი მიმართულებით მიცურავენ და ამ მიმართულებას ჰქვია დესტაბილიზაცია და რადიკალიზაცია“, – აღნიშნა მათიკაშვილმა.
პრეზიდენტის თავის მართლებასა და პოზიციის ცვლილებას მმართველ გუნდში არათანმიმდევრულ პოლიტიკად აფასებენ. ამბობენ, რომ სალომე ზურაბიშვილი კონსტიტუციის შემდეგ კანონსაც არღვევს, დგას ოპოზიციის მხარეს და ხელისუფლების ოპონენტებს უსაფუძვლო ბრალდებებს უმყარებს. საუბარია ოთარ ფარცხალაძის მოქალაქეობაზე. ოპოზიციის ნაწილი პრეზიდენტს ხელმოწერისკენ მოუწოდებს. სალომე ზურაბიშვილმა ჯერ თქვა, რომ ფარცხალაძეს საქართველოს მოქალაქეობას ჩამოართმევდა, შემდეგ შეწყვეტა მიზანშეწონილად აღარ მიიჩნია, ახლა კი სამთვიან ვადაზე საუბრობს.