ჩვენ არ გვგონია, რომ 100 ხმა იქნება პარლამენტში იმპიჩმენტის საკითხის გარშემო, ერთი მარტივი მიზეზის გამო, ჩვენ დარწმუნებული ვართ, რომ სალომე ზურაბიშვილს წინასწარ ჰქონდა გარანტიები, მან ზუსტად იცოდა, რომ რადიკალური ოპოზიცია, კოლექტიური „ნაცმოძრაობა“, მხარს არ დაუჭერდა მის იმპიჩმენტს, სწორედ ამის გამო გაბედა გარისკვა, გარისკა და არღვევდა საქართველოს კონსტიტუციას, – ამის შესახებ „ქართული ოცნების“ თავმჯდომარემ, ირაკლი კობახიძემ განაცხადა.
მისი თქმით, სალომე ზურაბიშვილმა ვერ გარისკა ბიუჯეტის ფულის გამოყენება.
„ზურაბიშვილმა ვერ გარისკა ბიუჯეტის ფულის გამოყენება ამისთვის, რადგან იქ ოპოზიციონერები არ იღებენ გადაწყვეტილებას არამიზნობრივ ხარჯებთან დაკავშირებით, თუმცა მან გარისკა და დაარღვია კონსტიტუცია, რადგან ჰქონდა პარლამენტში კოლექტიური „ნაცმოძრაობის“, რადიკალური ოპოზიციის იმედი“, – განაცხადა კობახიძემ.
ამასთან, კობახიძის განცხადებით, მმართველ გუნდს არ აქვს იმედი, რომ პარლამენტში 100 ხმა მოგროვდება, ამიტომ კიდევ ერთი წლით სალომე ზურაბიშვილი დარჩება პრეზიდენტის თანამდებობაზე.
„კიდევ ერთხელ გავიმეორებ, ჩვენ არ გვაქვს 100 ხმის მოლოდინი, შესაბამისად, ვფიქრობთ, რომ მომავალი წის ბოლომდე, კიდევ ერთი წელი, სალომე ზურაბიშვილი დარჩება პრეზიდენტის თანამდებობაზე. აქედან გამომდინარე, ამ სპეკულაციებს არ აქვს არავითარი საფუძველი და მხოლოდ ვაი ექსპერტებმა შეიძლება გააკეთონ ასეთი კომენტარები“, – აღნიშნა კობახიძემ.