საქართველოს პარლამენტის თავმჯდომარის, შალვა პაპუაშვილის განცხადებით, „შეკრებებისა და მანიფესტაციების შესახებ“ კანონს პრეზიდენტი ვეტოს თუ დაადებს, პარლამენტი დაძლევს.
მისივე თქმით, „ნაციონალურ მოძრაობას“ წამოსცდა, რომ პრეზიდენტი კანონზე ვეტოს დადებას აპირებს.
„ამ დღეებში იყო მცდელობა, გამეორებულიყო მარტის რადიკალური დღის წესრიგი. ზუსტად იგივე აქტორები, „ენჯეოები“, ოპოზიცია იყო ზუსტად იგივე დაბრენდვით, თითქოს, ეს იყო რუსული კანონი. ვნახეთ, რომ ეს რადიკალიზმი გუშინ არ შედგა. მადლობას ვუხდი უცხოელ აქტორებს, რომ არ ჩაერივნენ ამ პროცესში და ჰქონდათ კონსტრუქციული როლი. ოპოზიციის რადიკალიზმის პოტენციალი ძალიან დაბალია. ვნახეთ ისევ ექსტრემისტული ჯგუფები, „ნაცების“ ყალბი „ენჯეოები“ სხვადასხვა მოქმედებებით. გუშინ „ნაცმოძრაობას“ წამოსცდა, რომ პრეზიდენტი კანონს ვეტოს დაადებს. როგორც ჩანს, იციან, უკვე. ვეტო თუ იქნება, პარლამენტი დაძლევს, რადგან მიგვაჩნია, რომ ეს არის სწორი კანონი, პასუხობს უსაფრთხოების იმ გამოწვევებს, რომელიც საქართველოს აქვს. ვინც ყვირის, ზუსტად ისინი არიან რადიკალური ჯგუფების ნაწილი ან ამ ყველაფრის წამხალისებლები“, – განაცხადა პაპუაშვილმა.
პარლამენტმა „შეკრებებისა და მანიფესტაციების შესახებ“ კანონპროექტი მესამე მოსმენით გუშინ დაამტკიცა. ცვლილებებზე მსჯელობა დაჩქარებული წესით ორი დღის განმავლობაში მიმდინარეობდა.