ამდენი წლის მერე ჩემზე ძალიან ცუდად მოქმედებს ის, რომ სასამართლო პროცესზე ამ პოტენციურ მკვლელს, მეგის ქარდავას უნდა დავუპირისპირდე, – ამის შესახებ დაზარალებულმა ბელა როგავამ „ქრონიკისთვის“ მიცემულ ექსკლუზიურ ინტერვიუში განუცხადა.
მისი თქმით, მზად არის მეგის ქარდავას სასამართლო დარბაზში დაუპირისპირდეს.
„ჩამოვედი ჩემი სიმართლის დასამტკიცებლად და მზად ვარ, რომ მას დავუპირისპირდე. ის უარყოფს ყველა ბრალდებას, მაგრამ არსებობს ფაქტი, არსებობენ მოწმეები. ასევე, არსებობს ჩემი ჯანმრთელობის მდგომარეობის დამადასტურებელი ცნობა. არსებობს ფაქტები, როგორ მაწამა, მაგრამ მაქვს სამართლიანობის იმედი. ძალიან ბევრჯერ შეეცადა ხელი შეეშალა პროცესზე ჩემი დასწრებისთვის, ონლაინ ჩართვაზე უარი თქვა, ვიყავი ჩამოსული და არ დაესწრო პროცესს. მერე მოითხოვა ჩემი ჩამოსვლა, რატომღაც იფიქრა ალბათ, რომ შემეშინდებოდა. მე არ მეშინია ამ ჯალათის კლანის, ჩამოვედი, დღეს აქ ვარ და მზად ვარ დავუპირისპირდე მეგის ქარდავას“, – აღნიშნა ბელა როგავამ.
15 წლის შემდეგ, წამებისა და არაადამიანური მოპყრობის მსხვერპლი ბელა როგავა, მეგის ქარდავას სასამართლო დარბაზში შეხვდა. დაზარალებულის მიერ სასამართლოსთვის ჩვენების მიცემის პროცესი „ქრონიკამ“ ექსკლუზიურად გადაიღო.
დაზარალებული ემიგრაციიდან სპეციალურად ქარდავას წინააღმდეგ ჩვენების მისაცემად ჩამოვიდა. წამების საქმის ოქროს მოწმის დარბაზში გამოჩენა ქარდავასთვის მოულოდნელი აღმოჩნდა.
ბელა როგავამ პროცესზე 2009 წელს მის მიმართ განვითარებული მოვლენები გაიხსენა, როცა ის ორსულად იყო და მეგის ქარდავა მისგან ჩაუდენელი დანაშაულის აღიარებას ითხოვდა.
მისი თქმით, მას იარაღის მუქარით გააღებინეს პირი, რა დროსაც მას კბილი ჩაუმტვრიეს და გაურკვეველი სითხე დაალევინეს. როგორც მოწმემ პროცესზე განაცხადა, ეს ნარკოტიკი, ოპიუმი იყო. გონზე მოსვლის შემდეგ კიდევ ურტყამდნენ და იგი აღნიშნული დაკითხვის დროს პერიოდულად გონს კარგავდა.
„შემოიტანეს ერთჯერადი ჭიქით უფერული სითხე. ძალიან ცოტა. მივხვდი, რომ ეს არ იყო წყალი. გავუწიე წინააღმდეგობა, რა დროსაც მომქაჩა თმაზე ექონიამ. მან იარაღი აიღო, რადგანაც პირი არ გავაღე და ძალით გამაღებინა პირი, რა დროსაც ჩაიმტვრა კბილი და ეს სითხე კბილთან ერთად გადავყლაპე“, – განაცხადა ოქროს მოწმემ.