უნგრეთის პრემიერ-მინისტრი, ვიქტორ ორბანი კატეგორიულად არ უჭერს მხარს ევროპარლამენტის მოწოდებას, მიზანმიმართული სანქციები დაწესდეს აზერბაიჯანის მთავრობის წარმომადგენლების წინააღმდეგ ცეცხლის შეწყვეტის რეჟიმისა და ყარაბაღში ადამიანის უფლებების დარღვევის გამო.
“აზერბაიჯანი საკვანძო მნიშვნელობის ქვეყანაა. აზერბაიჯანის გარეშე ჩვენ ვერ მივაღწევთ ენერგეტიკულ დამოუკიდებლობას. თუ გვინდა რუსეთზე ენერგეტიკული დამოკიდებულება მოვიშოროთ, აზერბაიჯანი გვჭირდება, ეს აშკარაა. ეს სტრატეგიულად მნიშვნელოვანი ქვეყანაა”, – განაცხადა ვიქტორ ორბანმა.
5 ოქტომბერს, ევროპარლამენტმა რეზოლუცია მიიღო, რომელშიც დაგმო აზერბაიჯანის მიერ მთიანი ყარაბაღის ძალადობრივი დაპყრობა და ევროკავშირს მოუწოდა, გადახედოს ურთიერთობებს ოფიციალურ ბაქოსთან.
ევროპარლამენტი მოუწოდებს ევროკავშირს, დააწესოს მიზანმიმართული სანქციები აზერბაიჯანის ხელისუფლების იმ წარმომადგენლების წინააღმდეგ, რომლებიც პასუხისმგებელნი არიან მთიან ყარაბაღში ცეცხლის შეწყვეტისა და ადამიანის უფლებების დარღვევაზე.