საინტერესოა, რას გვირჩევს ჰერჩინსკი, იმის გამო, რომ ვიღაცამ შეიძლება დეპოლარიზაცია შეუსრულებელ რეკომენდაციად მიიჩნიოს, ყველაფერზე თვალი დავხუჭოთ და ვთქვათ, რომ ეს სახელმწიფო არ არის, არც კონსტიტუცია არსებობს, არც კანონი არსებობს და ვისაც რა უნდა ის აკეთოს?! – ამის შესახებ საქართველოს პარლამენტის პირველმა ვიცე-სპიკერმა გიორგი ვოლსკიმ „ქრონიკაში“ განაცხადა.
მისი თქმით, იმპიჩმენტის საკითხში სასიხარულო არაფერია.
„რამე სასიხარულო კი არ არის იმპიჩმენტის საკითხში, ამასთან დაკავშირებით არავითარი პოზიტიური განწყობა ჩვენ არ გაგვაჩნია. საზღვარგარეთ იყო პრეზიდენტი მაშინ, აქ პოლიციელებს ცოცხლად წვავდნენ და მოუწოდებდა იქიდან, რომ მე თქვენ გვერდით ვარ და თქვენ სწორად მოქმედებთო. ის ამბობს, რომ რუსულია ჩვენი მთავრობის პოლიტიკა, თავი რომ დავანებოთ ცალკეულ გამონათქვამებს, იყო 26 მაისის მოხსენება და პარლამენტში მოხსენება. ასეთ დროს რა უნდა ქნას დემოკრატიული საზოგადოების მთავრობამ, თუ არა ის, რომ იმპიჩმენტის საკითხი დააყენოს. ამაში სიკეთე არაფერია, მაგრამ ფაქტია, რომ ამას არ განაპირობებს ჩვენი დამოკიდებულება. საინტერესოა, რას გვირჩევს ევროკავშირის წარმომადგენელი, ჰერჩინსკი, რა გავაკეთოთ ასეთ შემთხვევაში, იმის გამო, რომ ვიღაცამ შეიძლება დეპოლარიზაცია შეუსრულებელ რეკომენდაციად მიიჩნიოს, ყველაფერზე თვალი დავხუჭოთ და ვთქვათ რომ ეს სახელმწიფო არ არის, არც კონსტიტუცია არსებობს, არც კანონი არსებობს და ვისაც რა უნდა ის უნდა აკეთოს?! ერთიც მინდა დავამატო, არ არის კონსტიტუციის მუხლების ფართოდ ინტერპრეტირება სწორი და იმის აუცილებლობა, რომ სამი დღე საკონსტიტუციო სასამართლო იხილავს, რომ რომელიღაც სხვა მუხლში რომელიღაც სხვა მუხლი ამართლებს პრეზიდენტს. როგორ შეიძლება, რომ ურთიერთგამომრიცხავი მუხლები ჰქონდეს კონსტიტუციას. მეორე მხრივ რეალობა ვიცით, მთავრობასთან უნდა შეათანხმო პოზიცია და ისე წარადგინო შენი ქვეყანა საერთაშორისო ასპარეზზე“, – აღნიშნა გიორგი ვოლსკიმ.