საქართველოს პარლამენტის თავმჯდომარის მოადგილის, არჩილ თალაკვაძის განცხადებით, “ნაციონალური მოძრაობა” და დავით კეზერაშვილი ერთმანეთს ეხმარებიან დესტრუქციულ გეგმებში.
“დავით კეზერაშვილი პირდაპირ ერევა პოლიტიკაში. თვითონაც აღიარა ეს არაერთხელ ეთერში, რომ აფინანსებს პარტიებს, ტელევიზიებს და ეხმარება ცალკეულ პოლიტიკოსებს. ის ცალკეული პოლიტიკოსები არიან ჩუმად მთელი ამ პერიოდის განმავლობაში. ამ შემთხვევაში, ეს დუმილი დასტურის ნიშანია. ნახევარი მილიონი დოლარი მხოლოდ ერთ კონტრაქტში, საქართველოს გასაშავებლად და ჩვენი ქვეყნის ინტერესების დასაზიანებლად იყო გადახდილი.
ასეთი ტიპის აქტივობა, ბუნებრივია, ვერ შედგება დავით კეზერაშვილს რომ არ ჰყავდეს მოკავშირეები აქ, ქართულ პოლიტიკაში, რადიკალურ ოპოზიციაში. ისინი რომ ერთმანეთთან დაფრინავენ, ერთმანეთს რომ თანაუგრძნობენ და ერთმანეთზე ძალიან ბევრს ფიქრობენ და ეხმარებიან ამ დესტრუქციულ გეგმებში, ეს არახალია,”- განაცხადა არჩილ თალაკვაძემ.