ნატოს გენერალურმა მდივანმა, იენს სტოლტენბერგმა განაცხადა, რომ უკრაინას ესაჭიროება საჰაერო თავდაცვის სისტემები, რადგან რუსეთის პრეზიდენტი შეეცდება, რომ ზამთარი იარაღად გამოიყენოს.
ამის შესახებ მან ნატოს თავდაცვის მინისტრების და “რამშტაინის” ფორმატის შეხვედრის დაწყებამდე განაცხადა.
”დღეს ჩვენ გვჭირდება მეტი მხარდაჭერის მობილიზება და პრეზიდენტმა ზელენსკიმ უკვე თქვა, რომ ეს ნიშნავს მეტ საჰაერო თავდაცვას, არტილერიას, საბრძოლო მასალას”, – თქვა მან.
სტოლტენბერგი მიესალმა განცხადებებს, რომლებიც გაკეთდა ბოლო ორი დღის განმავლობაში რუმინეთსა და გერმანიაში.
„მოველით, რომ ნატოს უფრო მეტი მოკავშირე გააკეთებს განცხადებას ახალი მხარდაჭერის შესახებ, რადგან ჩვენ გვჭირდება მხარდაჭერის შენარჩუნება და გაზრდა. საჰაერო თავდაცვა კრიტიკულია. ეს არის უკრაინის ეკონომიკა, კრიტიკული ინფრასტრუქტურა. ეს მათ ეხმარება – დაიცვან თავი, ივაჭრონ და თავად აწარმოონ საბრძოლო მასალა. პრეზიდენტი პუტინი კვლავ ემზადება ზამთრის იარაღად გამოსაყენებლად, რომ თავს დაესხას ენერგეტიკულ ინფრასტრუქტურას. ჩვენ ეს უნდა ავიცილოთ თავიდან უფრო მოწინავე და გაზრდილი საჰაერო თავდაცვის სისტემებით”, – დასძინა მან.