პარლამენტმა იმპიჩმენტის საკითხის განხილვაში მონაწილეობის მისაღებად საქართველოს პრეზიდენტი პარლამენტში უკვე მიიწვია და ოფიციალურ დასტურს ელის, – ამის შესახებ პარლამენტის თავმჯდომარემ შალვა პაპუაშვილმა განაცხადა.
მისი თქმით, სალომე ზურაბიშვილი პარლამენტის წინაშე თანამომხსენებლის რანგში წარდგება, თუმცა, მას არ ექნება დასკვნითი სიტყვის უფლება. იმპიჩმენტის საკითხის განხილვის შესაძლებლობა მომავალი ორი დღის განმავლობაში იქნება.
„ჩვენ გვაქვს 2 კვირა, ორ კვირაში უნდა იყოს გადაწყვეტილება მიღებული, ვინაიდან ახლა პლენარული სესიის კვირაა, ამიტომ შეგვიძლია განვიხილოთ საკითხი და კენჭი ვუყაროთ. ეს იქნება დადგენილების პროექტის არსი, რომ მიმდინარე კვირაში მოხდეს განხილვა და კენჭისყრა.
რაც შეეხება განხილვის ფორმას, ის მსგავსია პირველი მოსმენით საკითხის განხილვისა, კერძოდ, მომხსენებელი, ამ შემთხვევაში წარდგინების ავტორებიდან წარმომადგენელი გამოვა და წარმოადგენს თავის პოზიციას. შემდეგ რეგლამენტით გათვალისწინებულია, რომ პარლამენტს შეუძლია მოიწვიოს შესაბამისი თანამდებობის პირი, ამ შემთხვევაში, საქართველოს პრეზიდენტი, განხილვაში მონაწილეობის მისაღებად. მე გუშინ მქონდა მიმართვა, როგორც ჩანს, ქალბატონ პრეზიდენტს სურს მონაწილეობის მიღება და ველით საბოლოო პასუხს და თუ ეს სურვილი არის, რა თქმა უნდა, მოვიწვევთ განხილვაში მონაწილეობის მისაღებად. როგორც თანამომხსენებელი გამოდის შესაბამისი თანამდებობის პირი [ამ შემთხვევაში პრეზიდენტი], როგორც მომხსენებელთან ისე თანამომხსენებელთან არის კითხვებისა და დაზუსტებების შესაძლებლობა, ვინაიდან რაიმე დარგობრივი მოსაზრებები აქ არ არის რელევანტური, კომიტეტის გამოსვლები არ იქნება და გადავალთ უკვე უფრაქციო წევრების, პოლიტიკური ჯგუფებისა და ფრაქციების გამოსვლებზე და ამის შემდეგ დასკვნით სიტყვის უფლება ექნება მომხსენებელს, თუმცა არა თანამომხსენებელს. ეს იქნება პროცედურა საბოლოო ჯამში, რომლის განხილვის შემდეგ იქნება კენჭისყრა, იცით რომ 100 ხმა იქნება საჭირო.
რაც შეეხება იმას თუ როდის იქნება განხილვა, ვფიქრობ, ჩვენი გრაფიკიდან გამომდინარე, ვფიქრობ რომ ხვალ დილიდან შეგვიძლია განვიხილოთ, ოთხშაბათი -ხუთშაბათი არის ორი დღე როცა შეგვიძლია რომ განვიხილოთ საკითხი. იქნება განხილვის შესაძლებლობა, თუკი გსურთ თქვენი პოზიციების დაფიქსირება შეგეძლებათ, რომ დააფიქსიროთ და მათ შორის საქართველოს პრეზიდენტსაც ექნება შესაძლებლობა ამ განხილვაში როგორც თანამომხსენებელმა მიიღოს მონაწილეობა და გამოვიდეს თანამომხსენებლის რანგში“,- განაცხადა პაპუაშვილმა.