აშშ-ის სახელმწიფო დეპარტამენტმა საზღვარგარეთ მყოფ ამერიკელებს მოუწოდა, მეტი სიფრთხილე გამოიჩინონ. ამის მიზეზად უწყებაში თავდასხმების გაზრდილი ალბათობა დაასახელეს.
„მსოფლიოს სხვადასხვა ადგილას გაზრდილი დაძაბულობის გამო, აშშ-ის მოქალაქეებისა და ინტერესების წინააღმდეგ ტერორისტული თავდასხმების, დემონსტრაციების ან ძალადობრივი ქმედებების გამო, სახელმწიფო დეპარტამენტი ურჩევს აშშ-ის საზღვარგარეთ მყოფ მოქალაქეებს გამოიჩინონ მეტი სიფრთხილე“, – ნათქვამია განცხადებაში.
სარაკეტო დარტყმა ისრაელზე 7 ოქტომბერს, ადგილობრივი დროით 06:30 საათზე განხორციელდა. მომხდარზე პასუხისმგებლობა ტერორისტულმა ორგანიზაცია „ჰამასმა“ აიღო. ორგანიზაციაში ისრაელის წინააღმდეგ ახალი სამხედრო ოპერაციის დაწყების შესახებ განაცხადეს. ისრაელის თავდაცვის ძალებმა „ომისთვის მზადყოფნის მდგომარეობა“ გამოაცხადა და ღაზას სექტორში „ჰამასის“ ობიექტებზე იერიში დაიწყო.