ფოტოგრაფებისა და ხელოვანების მოწყობილი გადატრიალების ნამდვილად არ მჯერა, – ამის შესახებ, პარლამენტის დამოუკიდებელმა დეპუტატმა, თეონა აქუბარდიამ განაცხადა.
მისი თქმით, რევოლუციას ვერ აწყობ ხუთი ან ათი ადამიანი, თუ ხალხი არ მიჰყვება.
„ტრენინგებით რევოლუცია როდის გინახავთ, თუ ამისთვის არ არის შექმნილი ფონი, რომელსაც არ ქმნის ოპოზიცია, თუ ხელისუფლება სწორად იქცევა. გამოძიების შედეგებით ვიმსჯელოთ და არა გამოძიების პროცესით“, – აღნიშნა თეონა აქუბარდიამ.
სუსში მიმდინარე გამოძიების განხილვა პოლიტიკურ სპექტრში ისევ აქტუალური გახდა. მას შემდეგ, რაც გრიგოლ ლილუაშვილს პარლამენტში მოუსმინეს, ოპოზიციამ კიდევ ერთხელ დაიწყო იმის მტკიცება, რომ საქმე ხელოვნურია და მას პოლიტიკური დატვირთვა აქვს. სახელისუფლებო გუნდში კი თქვეს, რომ სუსის ხელმძღვანელის მოხსენებამ დაადასტურა, რომ საფრთხე რეალურია და სამოქალაქო არეულობას ცალკეული ძალები ნამდვილად გეგმავდნენ.