ისრაელის თავდაცვის მინისტრის, იოავ გალანტის განცხადებით, ისრაელის გეგმები მოიცავს „ჰამასის“ ლიკვიდაციას მისი სამხედრო შესაძლებლობების განადგურებით და ღაზაზე ისრაელის პასუხისმგებლობის სრულად მოხსნას ღაზის სექტორში ახალი „უსაფრთხოების რეჟიმის“ შექმნით. ამის შესახებ მან ქნესეთის საგარეო საკითხთა და თავდაცვის კომიტეტის სხდომაზე განაცხადა.
მისივე თქმით, ომი სამი მთავარი ფაზისგან შედგება.
„ახლა მიმდინარეობს პირველი ფაზა, რომელიც ითვალისწინებს საჰაერო დარტყმებს, შემდგომში კი სახმელეთო მანევრებს „ჰამასის“ ცოცხალი ძალისა და ინფრასტრუქტურის განადგურების მიზნით. მეორე ეტაპზე ბრძოლა ნაკლები ინტენსივობით გაგრძელდება, სამხედროების მიზანი კი „წინააღმდეგობის კერების აღმოფხვრა“ იქნება.
მესამე ფაზა იქნება ღაზის სექტორში ახალი უსაფრთხოების რეჟიმის შექმნა, რომლის ფარგლებშიც ისრაელს მოეხსნება პასუხისმგებლობა ღაზის სექტორში ყოველდღიურ ცხოვრებაზე“, – აღნიშნა იოავ გალანტმა.