თქვენ რა გგონიათ ახლა, ოპოზიცია ჩვენზე ნაკლებ ფულს ხარჯავს?! ამ ქვეყანაში არის ხალხი, ვინც მმართველ პარტიას წირავს თანხას, ოღონდ ისე კი არა, „ნაცები“ რომ ღამით დაიბარებდნენ და ნოტარიუსებთან აფორმებინებდნენ, ციხიდან რომ თითს დააქნევინებდნენ და ადვოკატის მეშვეობით ამბები გამოჰქონდათ, საშინელებებს აკეთებდნენ და ბიზნესს არეკეტებდნენ, – ამის შესახებ ჟურნალისტებს „ქართული ოცნების“ აღმასრულებელმა მდივანმა, ფრაქცია „ქართული ოცნების“ თავმჯდომარემ, მამუკა მდინარაძემ განუცხადა.
მისი თქმით, ოპოზიციას თუ რაიმე არგუმენტი აქვს, რომ „ქართულ ოცნებაში“ შავი ფული ტრიალებს, ერთი კითხვა მაინც უნდა ჰქონოდა და პარტიების დაფინანსებასთან დაკავშირებით პარლამენტში, იურიდიულ საკითხთა კომიტეტზე გამართულ მოსმენაზე დაესვათ.
„გახსოვთ თავიდან რა ამბავი ატეხეს [ოპოზიციამ] და შემდეგ ვენეციის კომისიის დასკვნაშიც აისახა და რეკომენდაცია გაგვიწიეს, რომ უმჯობესი იქნებოდა პარტიების დაფინანსება ვერ მოეხდინათ იურიდიულ პირებს. ამ რეკომენდაციას თანხმობა ვუთხარით და გავიზიარეთ და დღეს კომიტეტზე ოპოზიციის მხრიდან კითხვაც არ დასმულა. ესეც ერთ-ერთი პატარა, მაგრამ მნიშვნელოვანი ნაბიჯია ევროინტეგრაციის გზაზე და შესაბამისად, რეალურად არ აინტერესებთ. ყოველ ჯერზე ამ პატარ-პატარა საკითხებით დგინდება და ხელისგულზეა მტკიცებულება, რომ მათ [ოპოზიციას] რეალურად არ აინტერესებს ევროინტეგრაცია, მათ აქვთ თავისი დღის წესრიგი და აინტერესებთ ამ დღის წესრიგის განხორციელების დროს ინსტრუმენტად კანდიდატის სტატუსის და ევროინტეგრაციის თემის გამოყენება. ეს გამოიკვეთა დღეს კომიტეტზე“, – აღნიშნა მდინარაძემ.
პოლიტიკოსი არ ეთანხმება ოპოზიციის კრიტიკას, რომ „ქართული ოცნების“ დაფინანსება ე.წ. შავი ფულით ხდება.
„ადრე ამბობდნენ იურიდიული პირების მიერ ხდება დაფინანსებაო, ახლა ამბობენ ფიზიკური პირებისო. მოვხსნათ მაშინ საერთოდ პარტიებისთვის დაფინანსება. რაც ტყუილია, ის როგორ დავამტკიცოთ?! სად არის შავი ფული, მე მითხარით და მოვიძიებ. ყოველთვის ხდება ისე, რომ ან მოგონილ ამბებზე კეთდება სიუჟეტები, ან მოგონილი არგუმენტებია და კონკრეტული მტკიცებულება დღემდე ვერავინ დადო. არ აინტერესებთ ეს თემა, უბრალოდ უნდათ, ისროლონ ტალახი, ვიღაცა დაიჯერებს, ვიღაცა არა და მერე ეს ტალახი უნდა იწმინდო ყველა ჯერზე. ეს არის მათი მიზანი. თუ მართლა პარტიების დაფინანსების საკითხი აინტერესებთ, ოპოზიციამ ერთი კითხვა როგორ არ დასვა?! ერთი არგუმენტიც რომ ჰქონოდათ, ხომ მივიდოდნენ კომიტეტზე და ამას გაახმოვანებდნენ?! რეალურად იცით რაშია საქმე? – შავი ფული ტრიალებს „ნაცმოძრაობაში“. არ ვგულისხმობ პარტია „ნაციონალურ მოძრაობას“, მთელ კლასტერს ვგულისხმობ, იქ თავის დროზე, ბიუჯეტიდან მოპარული ფული ტრიალებს. უნდათ ხალხს მოაჩვენონ, რომ სხვაგანაც შავი ფული ტრიალებს. რეალურად რატომ ჩანს ხოლმე, რომ ჩვენი [პარტიის] ხარჯი გაცილებით დიდია ვიდრე მათი, იცით? – შავ ფულს არ ვატრიალებთ არსად და ყველაფერს თეთრად ვაჩვენებთ. თქვენ რა გგონიათ ახლა, ოპოზიცია ჩვენზე ნაკლებ ფულს ხარჯავს?! ამ ქვეყანაში არის ხალხი, ვინც მმართველ პარტიას წირავს თანხას, ოღონდ ისე კი არა „ნაცები“ რომ ღამით დაიბარებდნენ და ნოტარიუსებთან აფორმებინებდნენ, ციხიდან რომ თითს დააქნევინებდნენ და ადვოკატის მეშვეობით ამბები გამოჰქონდათ, საშინელებებს აკეთებდნენ და ბიზნესს არეკეტებდნენ“, – აღნიშნა მდინარაძემ.
„ქართული ოცნების“ ინიცირებული საკანონმდებლო პაკეტი, რომელიც პარტიების დაფინანსების საკითხს უკავშირდება, დღეს იურიდიულ საკითხთა კომიტეტის სხდომაზე პირველი მოსმენით განიხილეს და მხარი დაუჭირეს.