ესპანეთიდან ორი ამერიკელი ჯაშუში გააძევეს, რომლებსაც ოფიციალური მადრიდი „ეროვნული სადაზვერვო ცენტრის“ (CNI) ორი აგენტის მოსყიდვაში ადანაშაულებს. ამის შესახებ ესპანური გამოცემა El Pais-ი წერს.
გამოცემის ცნობით, ესპანეთის თავდაცვის მინისტრმა მარგარიტა რობლესმა განმარტებები მოსთხოვა აშშ-ის ელჩს ამ ქმედებების გამო, რომლებიც მოკავშირეებს შორის მტრულად და უჩვეულოდ მიიჩნევა.
El Pais-ის ცნობით, ორმა ამერიკელმა ჯაშუშმა ქვეყანა უკვე დატოვა, ხოლო CNI-ის ორი აგენტის წინააღმდეგ გამოძიება კონფიდენციალური ინფორმაციის გამჟღავნების ბრალდებით მიმდინარეობს. CNI-ის შიდა მოკვლევამ აჩვენა, რომ ეჭვმიტანილებმა მოიპოვეს არასანქცირებული წვდომა საიდუმლო ინფორმაციაზე, რომელიც მათი მუშაობის სფეროს არ ეხებოდა.
გამოძიების მტკიცებით, საშუალო რგოლის ოფიცერმა ამერიკელ ჯაშუშებს ინფორმაცია დიდი ოდენობით თანხის სანაცვლოდ მიაწოდა.