“ნიკანორ მელია „ნაციონალური მოძრაობიდან“ გააგდეს. მოისროლეს ლევან ხაბეიშვილის ხელით და უკან პანღური მიაყოლეს”, – ამის შესახებ მმართველი გუნდის წევრმა, ალუდა ღუდუშაურმა განაცხადა.
მისივე თქმით, მელიას ქმედებები უპრინციპო ადამიანის ქმედებებია.
„წარსული ქმედებებიდან გამომდინარე, ნიკანორ მელიას თამამად შეგვიძლია, „პუფი“ ვუწოდოთ. იმას, თუ ვინ ჩამოჯდება ამ პოლიტიკურ „პუფზე“, ჩვენი საზოგადოება მალე ნახავს. კარგად გვახსოვს, როგორ ამბობდა, რომ მას ვერავინ დაიჭერდა და შემდეგ მის თავს კანონმდებლობა ძალიან კარგად აღსრულდა. ამბობდა, რომ გირაოს არ გადაიხდიდა, მაგრამ გირაოს პირობა მიიღო და საპატიმროდან გამოვიდა. ამის შემდეგ ილანძღებოდა და იძახდა, რომ ოპოზიციიდან ყველა ის ადამიანი, ვინც პარლამენტში შევიდოდა, „პუფი“ იქნებოდა, მაგრამ მელია პარლამენტში პირველი შემოვარდა. ამ უპრინციპობისა და უთავმოყვარეობის შემდეგ, რა სერიოზული პოლიტიკური განაცხადი შეიძლება გააკეთოს ნიკანორ მელიამ?!“ – განაცხადა ალუდა ღუდუშაურმა.
ცნობისთვის, ნიკა მელიამ “ნაციონალური მოძრაობის“ დატოვების თაობაზე განცხადება გუშინ გააკეთა. მისივე თქმით, ის ახალ პარტიას აფუძნებს, რომელიც ბევრს გააკეთებს ქართული დემოკრატიისთვის.