რუსეთის პრეზიდენტმა, ვლადიმერ პუტინმა განაცხადა, რომ 2024 წლის საპრეზიდენტო არჩევნებში მიიღებს მონაწილეობას. ინფორმაციას რუსული საინფორმაციო სააგენტო „რია“ ავრცელებს.
სააგენტოს ცნობით, ამის შესახებ პუტინმა კრემლში სახელმწიფო დაჯილდოების ცერემონიაზე განაცხადა.
როგორც რუსული მედია წერს, ცერემონიის შემდეგ, ქვეყნის პრეზიდენტი „რუსეთის გმირის წოდებით დაჯილდოებულ პირებს ესაუბრა, რა დროსაც ოკუპირებულ დონეცკში, რუსეთის რეგიონული პარლამენტის თავმჯდომარემ, დონეცკელი სეპარატისტების ყოფილმა მეთაურმა, არტემ ჟოგამ პუტინს არჩევნებზე მონაწილეობის მიღება სთხოვა, რაზეც პუტინმა განაცხადა, რომ ის აპირებს მონაწილეობის მიღებას.“
მანამდე, რუსეთის პრეზიდენტს ოფიციალურად არ დაუდასტურებია, მიიღებდა თუ არა მონაწილეობას 2024 წლის საპრეზიდენტო არჩევნებში.
მედიის ინფორმაციით, 2024 წლის არჩევნები რუსეთში 15 მარტს დაიწყება და 17 მარტს დასრულდება.
ვლადიმერ პუტინისთვის ეს უკვე მეხუთე საპრეზიდენტო არჩევნები იქნება, რომელშიც მონაწილეობას მიიღებს. პირველად ის პრეზიდენტის თანამდებობაზე 2000 წელს აირჩიეს.