უნგრეთის პრემიერმინისტრმა ვიქტორ ორბანმა გამოთქვა მოსაზრება, რომ რუსეთი უნიკალური ქვეყანაა, და ევროპისგან განსხვავდება.
ამის შესახებ მან Le Point-თან ინტერვიუში თქვა.
მისი აზრით, რუსეთი მიეკუთვნება ცივილიზაციის განსხვავებულ ფორმას, რომელსაც ევროკავშირთან და ევროპულ კონტინენტთან ვერ შეადარებ.
“მოლოდინი, რომ რუსეთი ევროპას დაემსგავსება – ილუზიაა. ისტორიულად, პოლიტიკურად, გეოგრაფიულად და ტრადიციულად ის სრულიად განსხვავებული ქვეყანაა”, – თქვა ორბანმა.
უნგრეთის პრემიერმინისტრმა ასევე ხაზგასმით აღნიშნა, რომ რუსეთსა და ევროპას შორის უთანხმოება არ უნდა გახდეს დაბრკოლება თანამშრომლობისთვის.
“ეს განსხვავებები არ უნდა იყოს მიზეზი, რომ არ ვითანამშრომლოთ. თუ ამ ლოგიკას გავყვებით, ევროპას მოუწევდა უარი ეთქვა თანამშრომლობაზე მსოფლიოს ორ მესამედთან, რაც არაგონივრულია”, – თქვა ორბანმა.
მისი თქმით, მნიშვნელოვანია „რაციონალური დისკუსიები“ იმის შესახებ, თუ როგორ შეუძლია ევროპას რუსეთთან ურთიერთობების დამყარება, განსაკუთრებით, მისი მნიშვნელოვანი გავლენის გათვალისწინებით.
ორბანმა აღიარა, რომ ევროკავშირში არის უთანხმოება რუსეთთან ურთიერთობასთან დაკავშირებით, მაგრამ ხაზი გაუსვა რუსეთის ფედერაციის მიმართ ახალი ევროპული სტრატეგიის შემუშავების აუცილებლობას.
ორბანი დარწმუნებულია, რომ ევროპას სჭირდება გეგმა B და ახალი სტრატეგია რუსეთთან ურთიერთობისთვის, “რადგან ის არსებობს და ძლიერია”.