NDI-ს კვლევა როგორც ადრე, ახლაც წარმოადგენს მონაცემებს, რომელიც აბსოლუტურად აცდენილია რეალობას. „ქართული ოცნების“ 19% იმდენად არასერიოზულად გამოიყურება, ალბათ თვითონაც ვერ იჯერებენ რა დაწერეს ხელოვნურად ამ მონაცემებით, – ამის შესახებ, პარლამენტის განათლებისა და მეცნიერების კომიტეტის თავმჯდომარემ, გივი მიქანაძემ საქართველოსთვის კანდიდატის სტატუსის მინიჭების საკითხზე საუბრისას „ქრონიკაში“ ჩართვისას განაცხადა.
„აქ არის ერთი კონკრეტული გარემოება, რომელიც თვალსაჩინოა – ოპოზიცია ჯამში, ერთობლივად ამ გაყალბებული მონაცემებითაც კი, „ქართულ ოცნებას“ ვერ უსწრებს. თუკი პროპორციულობის კონტექსტით შევაფასებთ ამ ყველაფერს და გადავიტანთ პროპორციულად და შევადარებთ „გორბის“ კვლევებს, პროპორცია დაცულია იმ განსხვავების რაც არის მაგალითად „ქართულ ოცნებასა“ და ნაციონალურ მოძრაობას შორის. ფაქტი არის ერთ: 2012 წლის 1-ელი ოქტომბრიდან მოყოლებული ოპოზიციამ და მათმა გარე მხარდაჭერებმა ვერ შეძლეს ქართული საზოგადოების გადარწმუნება, გამომდინარე იქიდან, რომ საზოგადოება ჯანსაღად აფასებს იმ მოვლენებს, რაც ქვეყანაში ვითარდება. სწორად აფასებს იმას, რომ ეროვნულ ინტერესებზე ორიენტირებული ხელისუფლებაა, რომელიც ზრუნავს თითოეული მოქალაქის კეთილდღეობაზე, ქვეყნის უსაფრთხოებაზე და ევროპულ ოჯახში ჩვენი ქვეყნის ღირსეულ ინტეგრაციაზე“, – აცხადებს მიქანაძე.