“OECD-ს კვლევაში „მცირე და საშუალო მეწარმეობის პოლიტიკის ინდექსი“ საქართველო 12-დან 11 მიმართულებით ლიდერობს”

OECD-ს კვლევა „მცირე და საშუალო მეწარმეობის პოლიტიკის ინდექსი“ ძალიან კომპლექსურია და მოიცავს სხვადასხვა სფეროს. ამაში შედის პასუხისმგებლიანი მთავრობა, ფინანსებზე ხელმისაწვდომობა, ბაზარზე წვდომა, სხვადასხვა სახელმწიფო სერვისის ხელმისაწვდომობა, სერვისების გაციფრულება და ა.შ., – ამის შესახებ „ქრონიკის“ ეთერში ეკონომიკისა და მდგრადი განვითარების მინისტრის მოადგილემ, ირაკლი ნადარეიშვილმა განაცხადა.

„12-დან 11 მიმართულებით საქართველო ლიდერობს ისეთ ქვეყნებთან შედარებით, როგორებიცაა უკრაინა, მოლდოვა, აზერბაიჯანი და სომხეთი. რაც შეეხება მე-12 ინდიკატორს, ეს არის მწვანე ეკონომიკა, რომელიც ჩვენი მთავრობისთვის პრიორიტეტს წარმოადგენს. მთელი რიგი პროექტები ხორციელდება, მათ შორის დონორების ჩართულობით. მომავალი წლიდან უშუალოდ „აწარმოე საქართველოში“, თავისი სამეწარმეო მხარდამჭერი პროგრამების ფარგლებში დაიწყებს სპეციალურ პროგრამებს, რომელიც დაეხმარება მცირე და საშუალო ბიზნესს მწვანე ინიციატივებისა და ამ მიმართულებების განვითარებაში. ის, რომ ამ ინდიკატორის თანახმად მეორე ადგილზე ვართ, ეს არის სტიმული იმისთვის, რომ ამ მიმართულებით კიდევ უფრო მეტი ვიმუშაოთ“, – აღნიშნა ირაკლი ნადარეიშვილმა